काठमाडौँ । नेपाली बजारमा लगातार बढिरहेको सुनको मूल्यमा बुधबार ठूलो गिरावट आएको छ। मंगलबार प्रतितोला दुई हजार पाँच सय रुपैयाँले बढेर नयाँ रेकर्ड कायम गरेको सुनको भाउ आज एकैदिन प्रतितोला ११ हजार रुपैयाँले घटेको हो।
नेपाल सुनचाँदी व्यवसायी महासंघका अनुसार बुधबारका लागि छापावाल सुनको मूल्य प्रतितोला तीन लाख १७ हजार ६०० रुपैयाँ निर्धारण गरिएको छ। अघिल्लो दिन अर्थात् मंगलबार छापावाल सुन प्रतितोला तीन लाख २८ हजार ६०० रुपैयाँमा कारोबार भएको थियो।
सुनसँगै आज चाँदीको मूल्यमा पनि उल्लेख्य गिरावट देखिएको छ। महासंघका अनुसार चाँदीको मूल्य प्रतितोला २७५ रुपैयाँले घटेको छ। मंगलबार प्रतितोला पाँच हजार ८१५ रुपैयाँमा कारोबार भएको चाँदी बुधबार पाँच हजार ५४० रुपैयाँमा झरेको छ।
अन्तर्राष्ट्रिय बजारमा पनि सुनको मूल्यमा उतारचढाव देखिएको छ। आज अन्तर्राष्ट्रिय बजारमा सुन प्रतिऔंस पाँच हजार १५४ अमेरिकी डलरमा कारोबार भइरहेको छ।
