काठमाडाैं । भोलि फागुन २१ गते हुने प्रतिनिधिसभाको ऐतिहासिक निर्वाचनमा सहभागी हुन काठमाडौँ उपत्यकाबाट ठुलो संख्यामा मानिसहरू बाहिरिएका छन्। आफ्नो मताधिकार प्रयोग गर्न आतुर करिब साढे ७ लाख मतदाताहरू कार्यथलो छोडेर गाउँघरतिर लागेपछि सधैँको भीडभाड रहने राजधानी यतिबेला निकै शान्त र सुनसान देखिएको छ। निर्वाचन क्षेत्र पुग्नै पर्ने बाध्यता र उत्साहका कारण उपत्यकाका नाकाहरूमा पछिल्ला दिनहरूमा चाप बढेको थियो।
यो निर्वाचनको पृष्ठभूमि निकै उतारचढावपूर्ण रहेको छ। गत भदौ २३ र २४ गते भएको ‘जेनजी’ (Gen-Z) आन्दोलनको राप र चापका कारण तत्कालीन प्रधानमन्त्री केपी शर्मा ओलीले पदबाट राजीनामा दिनुपरेको थियो। सोही राजनीतिक संकटका बीच मुलुकको बागडोर पूर्वप्रधानन्यायाधीश सुशीला कार्कीको नेतृत्वमा बनेको अन्तरिम सरकारले सम्हाल्यो। कार्कीले नै प्रतिनिधिसभा विघटन गरी नयाँ जनादेशका लागि राष्ट्रपति रामचन्द्र पौडेलसमक्ष सिफारिस गरेपछि भोलिको निर्वाचनको मिति तय भएको हो।
सरकारले मतदानका लागि सुरक्षा र व्यवस्थापनका सम्पूर्ण प्रक्रियाहरू पुरा भएको सुनिश्चित गरेको छ। निर्वाचनलाई मर्यादित र व्यवस्थित बनाउन आज मध्यरातदेखि नै सवारी आवागमनमा कडाइ गरिएको छ। भोलि मतदानको कार्य नसकिउन्जेलसम्मका लागि निजी तथा सार्वजनिक दुवै प्रकारका सवारी साधन सञ्चालनमा पूर्ण रोक लगाइएको छ, जसले गर्दा निर्वाचनको दिन सडकहरू पूर्णतः शान्त रहनेछन्।
राजनीतिक परिवर्तन पछिको यो पहिलो ठुलो निर्वाचनले मुलुकलाई कुन दिशामा लैजाने हो भन्ने चासो सबैतिर छ। अन्तरिम सरकार र निर्वाचन आयोगको सक्रियतासँगै अबको केही घण्टापछि नेपाली जनताले आफ्नो भविष्यको फैसला ब्यालेट बक्समार्फत गर्दैछन्।
