काठमाडौँ । निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनका लागि देशभरका अस्पताल तथा स्वास्थ्य संस्थाहरूलाई उच्च सतर्कताका साथ तयारी अवस्थामा रहन निर्देशन दिएको छ। निर्वाचनका क्रममा मतदान केन्द्रमा खटिने कर्मचारी, सुरक्षाकर्मी र मतदान गर्न आउने मतदाताहरूलाई पर्न सक्ने आकस्मिक स्वास्थ्य समस्यालाई मध्यनजर गर्दै आयोगले यस्तो निर्णय गरेको हो।
आयोगका प्रवक्ता नारायणप्रसाद भट्टराईका अनुसार मतदानस्थलमै आकस्मिक स्वास्थ्य सहायता उपलब्ध गराउने व्यवस्था मिलाउन स्वास्थ्य तथा जनसङ्ख्या मन्त्रालय र सङ्घीय मामिला तथा सामान्य प्रशासन मन्त्रालयमार्फत पत्राचार गरिएको छ। यसअन्तर्गत देशभरका चिकित्सक, स्वास्थ्यकर्मी र आवश्यक औषधिहरू तयारी अवस्थामा राख्न भनिएको छ।
यस्तै, आयोगको सिफारिस बमोजिम सरकारले निर्वाचनका लागि मतदानको दिन अघि र पछि गरी तीन दिन सार्वजनिक बिदा दिने निर्णय गरिसकेको छ। मतदान प्रक्रियालाई व्यवस्थित बनाउन फागुन १९ गतेदेखि २१ गतेसम्म मतदान केन्द्र रहेका शिक्षण संस्था, स्वास्थ्य चौकी र वडा कार्यालयका भौतिक संरचनाहरू उपयोग गर्ने गरी समन्वय मिलाइएको आयोगले जनाएको छ। निर्वाचनलाई स्वच्छ, स्वतन्त्र र भयरहित वातावरणमा सम्पन्न गर्न आयोगले सबै सरोकारवाला निकायहरूसँग निरन्तर सहकार्य गरिरहेको छ।
