काठमाडौँ । राष्ट्रिय स्वतन्त्र पार्टी (रास्वपा) ले नवनिर्वाचित सांसदहरूका लागि आयोजना गरेको दुई दिने आवासीय अभिमुखीकरण कार्यक्रममा पार्टीका वरिष्ठ नेता बालेन्द्र शाह (बालेन) सहभागी नहुने भएका छन्। काठमाडौँको एक होटलमा मंगलबारदेखि सुरु भएको यस विशेष प्रशिक्षण कार्यक्रम आज बुधबार समापन हुँदैछ। कार्यक्रमको समापन सत्रमा पार्टी सभापति रवि लामिछाने छोटो समयका लागि सहभागी हुने भए पनि भावी प्रधानमन्त्रीका रूपमा चर्चामा रहेका नेता शाह भने उपस्थित नहुने निश्चित भएको हो।
रास्वपा प्रवक्ता मनिष झाले अभिमुखीकरणको दोस्रो दिन सभापति लामिछानेको उपस्थिति रहने भए तापनि वरिष्ठ नेता शाह सहभागी नहुने जानकारी दिनुभयो। नयाँ सांसदहरूलाई संसदीय अभ्यास, वर्तमान कानुनी व्यवस्था र पार्टीको कार्यदिशाबारे जानकारी दिन आयोजित यस कार्यक्रममा शीर्ष नेताको अनुपस्थितिलाई लिएर विभिन्न अड्कलबाजीहरू सुरु भएका छन्। यद्यपि, प्रवक्ता झाले यसलाई स्वाभाविक प्रक्रियाका रूपमा लिन आग्रह गर्नुभएको छ।
प्रवक्ता झाका अनुसार वरिष्ठ नेता शाह हाल आगामी सरकार गठनको गृहकार्य र महत्त्वपूर्ण राजनीतिक परामर्शमा व्यस्त रहनुभएको छ। “आगामी दिनमा उहाँले शारीरिक र मानसिक रूपमा निकै खट्नुपर्ने अवस्था छ, त्यसैले सरकार निर्माणको तयारीमा केन्द्रित हुनुभएका कारण उहाँ यस कार्यक्रममा सहभागी हुन नसक्नुभएको हो,” झाले स्पष्ट पार्नुभयो। उहाँले यस अनुपस्थितिलाई लिएर कुनै राजनीतिक अर्थ वा आशङ्का नगर्न समेत अनुरोध गर्नुभएको छ।
रास्वपाले आफ्ना सांसदहरूलाई संसद्मा प्रभावकारी भूमिका खेल्न र जनमुखी कानुन निर्माणमा केन्द्रित हुन यो आवासीय प्रशिक्षण दिएको हो। पार्टीभित्र शक्ति बाँडफाँट र मन्त्रिपरिषद् गठनको चर्चा चुलिएका बेला वरिष्ठ नेता शाहको अनुपस्थितिले सत्ता समीकरणको तयारीलाई थप तीव्रता दिएको सङ्केत गरेको छ। आजको समापन सत्रपछि रास्वपाका नवनिर्वाचित प्रतिनिधिहरू औपचारिक रूपमा संसदीय जिम्मेवारी सम्हाल्न तयार हुनेछन्।
