काठमाडौँ । नेपाली कांग्रेसका सभापति गगन थापाले पार्टीको नराम्रो चुनावी पराजयको नैतिक जिम्मेवारी लिँदै आफ्नो पदबाट राजीनामा दिएका छन्। गत फागुन २१ गते सम्पन्न प्रतिनिधि सभा निर्वाचनमा पार्टीले अपेक्षा गरेभन्दा निकै कमजोर नतिजा ल्याएपछि थापाले पद त्याग गर्ने निर्णय गरेका हुन्। यसपटकको निर्वाचनमा थापा आफैँ पनि सर्लाही क्षेत्र नम्बर ४ बाट पराजित भएका थिए। उनलाई राष्ट्रिय स्वतन्त्र पार्टी (रास्वपा) का उम्मेदवार डा. अमरेशकुमार सिंहले १२ हजारभन्दा बढी मतान्तरले पराजित गरेका हुन्।
यसअघि काठमाडौँ क्षेत्र नम्बर ४ बाट लगातार निर्वाचन जित्दै आएका थापा यसपटक मधेश झरेका थिए। तर, १८ वर्ष लामो उनको संसदीय यात्रामा यसपटक पूर्णविराम लागेको छ। रास्वपाले देशैभरि अभूतपूर्व सफलता हासिल गरी करिब दुई–तिहाइ सिट जितेका बेला कांग्रेस प्रत्यक्षतर्फ १८ र समानुपातिकतर्फ २० गरी जम्मा ३८ सिटमा खुम्चिएको छ। निर्वाचनअघि भएको विशेष महाधिवेशनबाट सर्वसम्मत रूपमा सभापति निर्वाचित भएका थापाले ‘पुस्तान्तरण र रूपान्तरण’ को नारा दिए पनि चुनावी नतिजाले त्यसलाई अनुमोदन गर्न सकेन।
चुनावी नतिजा सार्वजनिक भएलगत्तै थापाले राजीनामा दिने तयारी गरे पनि पार्टीका उपसभापति विश्वप्रकाश शर्मा लगायतका नेताहरूले हतार नगर्न सुझाव दिँदै आएका थिए। शर्माले “यो हार एक व्यक्तिको मात्र नभई समग्र परिस्थिति र पुरानो कार्यशैलीको उपज” भएको भन्दै थापालाई रोक्ने प्रयास गरेका थिए। यद्यपि, पार्टीभित्रको अर्को पक्ष (देउवा समूह) ले भने नेतृत्वको असफलताका कारण पार्टीले यो दुर्गति भोगेको भन्दै तत्काल राजीनामा दिन दबाब दिँदै आएको थियो।
थापाले बुझाएको राजीनामा पत्रबारे औपचारिक निर्णय लिन नेपाली कांग्रेसले भोलि चैत्र ६ गते शुक्रबारका लागि केन्द्रीय कार्यसमितिको बैठक बोलाएको छ। सानेपास्थित पार्टी कार्यालयमा बस्ने उक्त बैठकमा थापाको राजीनामा स्वीकृत गर्ने वा अस्वीकृत गर्ने भन्नेमा चर्को बहस हुने देखिएको छ। थापाको राजीनामाले कांग्रेसभित्र नयाँ नेतृत्वको खोजी वा पुरानै नेतृत्वको पुनरागमनबारे गम्भीर बहस सिर्जना गरेको छ।
