काठमाडौँ । बीचको भीषण युद्ध आज तेस्रो हप्तामा प्रवेश गरेको छ। गत फेब्रुअरी २८ बाट सुरु भएको यो सैन्य द्वन्द्वले अहिले खाडी क्षेत्रका अन्य मुलुकहरूलाई समेत चपेटामा पारेको छ, जसमा संयुक्त अरब इमिरेट्स (युएई) प्रत्यक्ष मारमा परेको छ।
इरानी आक्रमण सुरु भएयता युएईमा मृत्यु हुनेको संख्या ८ पुगेको छ। मृत्यु हुनेमा आफ्नो राष्ट्रिय कर्तव्य पालना गरिरहेका दुई सैनिकका साथै ६ जना सर्वसाधारण रहेका छन्। सर्वसाधारणतर्फ एक नेपाली नागरिकसहित पाकिस्तानी, बंगलादेशी र प्यालेस्टिनी नागरिकले ज्यान गुमाएका हुन्। युएईको अबु धाबीस्थित बानी यास क्षेत्रमा ब्यालिस्टिक मिसाइललाई हवाई प्रतिरक्षा प्रणालीले बीचैमा नष्ट गरे पनि त्यसका अवशेषहरू खस्दा मानवीय क्षति हुन पुगेको हो।
आक्रमण सुरु भएदेखि युएईको हवाई रक्षा प्रणालीले ठूलो संख्यामा इरानी क्षेप्यास्त्र र ड्रोनहरूलाई विफल पारेको छ। आधिकारिक तथ्याङ्क अनुसार हालसम्म ३०४ ब्यालिस्टिक मिसाइल, १५ क्रुज मिसाइल र १,६२७ मानवरहित विमान (ड्रोन) हरूलाई आकाशमै नष्ट गरिएको छ। यद्यपि, लगातारको आक्रमणले युएईको सुरक्षा चुनौती बढाएको छ।
युद्धका कारण युएईको ऊर्जा क्षेत्रमा पनि गम्भीर अवरोध सिर्जना भएको छ। युएईको शाह ग्यास क्षेत्रमा भएको ड्रोन आक्रमणपछि त्यहाँको सञ्चालन स्थगित गरिएको छ, जसले आन्तरिक ग्रिडमा हुने दैनिक ५० करोड घनफिट ग्यास आपूर्ति रोकेको छ। यस्तै, महत्वपूर्ण निर्यात केन्द्र फुजैराह बन्दरगाहमा भएको नयाँ आक्रमण र आगलागीका कारण सरकारी कम्पनी एड्नोकले तेल लोड गर्ने कार्य बन्द गरेको छ।
इरानले हर्मुज जलमार्गमा नियन्त्रण जमाएपछि युएईका अन्य निर्यात केन्द्रहरू पनि विश्व बजारबाट लगभग विच्छेद भएका छन्। यसले गर्दा युएईको दैनिक कच्चा तेल उत्पादन आधाभन्दा बढीले घटेको छ। युएईको रक्षा मन्त्रालयले राज्यको सार्वभौमसत्ता र सुरक्षामा आँच पुऱ्याउने कुनै पनि प्रयासको कडा प्रतिकार गर्ने प्रतिबद्धता जनाउँदै बासिन्दाहरूलाई सतर्क रहन र आधिकारिक सूचनाको मात्र विश्वास गर्न आग्रह गरेको छ।
