कांग्रेस केन्द्रीय कार्यसमितिको बैठक मङ्सिर ५ पछि बस्ने, जिल्ला र प्रदेश अधिवेशनको मिति तोकिने

काठमाडौँ । नेपाली कांग्रेसको १५ औँ महाधिवेशन सम्पन्न भएपछिको पहिलो केन्द्रीय कार्यसमिति बैठक आगामी मङ्सिर ५ गतेपछि मात्रै बस्ने भएको छ। पार्टी महामन्त्री प्रदीप पौडेलले केन्द्रीय कार्यसमिति बैठक मङ्सिर ५ गतेपछिका लागि आह्वान गर्ने तयारी भइरहेको र बैठकमा प्रस्तुत गरिने कार्यसूची (एजेन्डा) का विषयमा शीर्ष नेतृत्वबिच आवश्यक छलफल जारी रहेको जानकारी दिएका छन्।

जिल्ला र प्रदेश तहका अधिवेशनहरू सम्पन्न नगरी केन्द्रीय महाधिवेशन सम्पन्न गरेको कांग्रेसले अब बस्ने केन्द्रीय कार्यसमिति बैठकबाट ती दुवै तहका अधिवेशनको आधिकारिक मिति तथा कार्यतालिका निर्धारण गर्नेछ। पार्टी नेता गगन थापाले यसअघि नै केन्द्रीय कार्यसमितिमार्फत जिल्ला र प्रदेश अधिवेशनको प्रक्रिया तत्काल अघि बढाउने स्पष्ट पारिसकेका छन्।

छठ पर्वको अवसरमा आफ्नो निर्वाचन क्षेत्र सर्लाही-४ पुगेका नेता थापाले पुसको पहिलो साता जिल्ला अधिवेशन र त्यसको तीन-चार दिनपछि प्रदेश अधिवेशन गर्ने गरी प्रस्ताव लगिने बताएका थिए। केन्द्रीय नेतृत्व चयन भइसकेपछि तल्लो तहका संरचनालाई थप चलायमान र सुदृढ बनाउन बाँकी रहेका अधिवेशनहरू समयमै सम्पन्न गर्नु पार्टीका लागि अनिवार्य बनेको छ।

मङ्सिर ५ पछि बस्ने बैठकले अधिवेशनको कार्यतालिकाका अतिरिक्त मुलुकको समसामयिक राजनीतिक अवस्था, संसद्मा पार्टीको भूमिका तथा भ्रातृ एवं शुभेच्छुक संस्थाहरूको पुनर्संरचनाका विषयमा समेत ठोस निर्णय लिने बताइएको छ। नयाँ कार्यसमिति बनेपछिको पहिलो औपचारिक बैठक भएकाले यसलाई कांग्रेस वृत्तमा निकै चासो र महत्त्वका साथ हेरिएको छ।

यो समाचार सेयर गर्नुहोस्:

नोट :हजुरको पनि गाउँ, टोल, छर-छिमेक वा समाजमा कुनै सुचना, संदेश, या नयाँ जानकारी छन् भने, तत्काल हामीलाई सम्पर्क गर्नुहोस, हामि त्यसलाई समाचार बनाउने छौं । साथै suryapatra.com बाट प्रकाशित समाचारमा कुनै सुझाव,सल्लाह र प्रतिक्रिया भए वा बिज्ञापन दिनु परेमा हामीलाई सम्पर्क गर्नुहोस जसको लागि हाम्रो इमेल :-suryapatra.org@gmail.com तपाईं हामी सँग फेसबुक र ट्विटरमा पनि जोडिन सक्नुहुन्छ ।

थप समाचार

ताजा