काठमाडौँ । नेपाली बजारमा लगातार बढिरहेको सुनको मूल्यमा बिहीबार सामान्य गिरावट आएको छ। पछिल्ला केही दिनदेखि दिनहुँ नयाँ रेकर्ड बनाइरहेको सुनको भाउ आज प्रतितोला १०० रुपैयाँले ओरालो लागेको हो।
नेपाल सुनचाँदी व्यवसायी महासंघका अनुसार आज छापावाल सुन प्रतितोला ३ लाख ६ हजार ५०० रुपैयाँ कायम गरिएको छ। बुधबार सुनको मूल्य हालसम्मकै उच्च बिन्दु ३ लाख ६ हजार ६०० रुपैयाँमा कारोबार भएको थियो।
सुनको मूल्य घटे पनि चाँदीको भने बढेको छ। आज चाँदीको मूल्य तोलामा ५० रुपैयाँले वृद्धि भएको छ। महासंघका अनुसार बिहीबार चाँदी प्रतितोला ५ हजार ३४० रुपैयाँमा खरिदबिक्री भइरहेको छ। बुधबार यसको मूल्य प्रतितोला ५ हजार २९० रुपैयाँ थियो।
अन्तर्राष्ट्रिय बजारमा बहुमूल्य धातुको मूल्यमा आउने उतारचढाव र डलरको विनिमय दरका कारण नेपाली बजारमा पनि सुनचाँदीको भाउ फेरबदल भइरहने महासंघले जनाएको छ।
