काठमाडाैं । धनुषा क्षेत्र नम्बर ४ मा चुनावी सरगर्मीका बीच एक उम्मेदवार ‘पैसाको बिटो’ सहित रङ्गेहात समातिएका छन्। निर्वाचन आचारसंहिताको धज्जी उडाउँदै मतदाता फकाउन नगद बाँडिरहेको आरोपमा स्वतन्त्र उम्मेदवार राजकिशोर महरालाई प्रहरीले नियन्त्रणमा लिएको हो।
महरालाई क्षीरेश्वरनाथ नगरपालिका–४ स्थित चन्द्रपुर टोलबाट पैसा बाँडिरहेकै अवस्थामा पक्राउ गरिएको सुरक्षा स्रोतले जनाएको छ। खानतलासीका क्रममा उनको साथबाट ४५ हजार रुपैयाँभन्दा बढी नगद फेला परेको छ, जुन उनले मतदाताहरूलाई प्रभावित पार्न प्रयोग गर्न लागेको प्रारम्भिक अनुमान गरिएको छ।
भोलिको मतदानलाई लक्षित गरी मौन अवधिमा हुने यस्ता अवाञ्छित क्रियाकलाप रोक्न प्रहरीले सक्रियता बढाएको छ। पक्राउ परेका महरामाथि थप अनुसन्धान भइरहेको र निर्वाचन ऐनअनुसार कारबाही प्रक्रिया अगाडि बढाइने बताइएको छ।
