काठमाडौँ । हाल नेपालमा उपल्लो वायुमण्डलमा रहेको उच्च चापीय प्रणाली र पूर्वी भू-भाग नजिक रहेको न्यून चापीय क्षेत्रको आंशिक प्रभावका कारण आज देशका अधिकांश स्थानमा मौसममा बदली आउने जल तथा मौसम विज्ञान विभागले जनाएको छ।
महाशाखाका अनुसार आज सोमबार कोशी, मधेस, बागमती, गण्डकी र लुम्बिनी प्रदेशका साथै कर्णाली र सुदूरपश्चिमका पहाडी तथा हिमाली भू-भागमा साधारणतया बादल लाग्नेछ। कोशी, मधेस, बागमती, गण्डकी र लुम्बिनीका पहाडी क्षेत्रका थोरै स्थानहरूमा तथा बाँकी प्रदेशका पहाडी भेगका एक-दुई स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ।
तराईका केही स्थानहरूमा भने आज बिहानदेखि नै तुवाँलो लागेको छ, जसका कारण पारदर्शिता (Visibility) मा केही कमी आउन सक्ने देखिएको छ। पहाडी र हिमाली क्षेत्रमा वर्षा र हिमपातका साथै चट्याङको समेत जोखिम रहेकाले आवश्यक सतर्कता अपनाउन मौसम पूर्वानुमान महाशाखाले अनुरोध गरेको छ।
