काठमाडौँ । भारतको दुई दिने औपचारिक भ्रमणमा रहेका प्रधानमन्त्री बालेन शाह र भारतीय विदेशमन्त्री डा. एस जयशंकरबिच नयाँ दिल्लीमा महत्वपूर्ण भेटवार्ता सुरु भएको छ। आइतबार साँझ नयाँ दिल्लीस्थित पाँचतारे होटल ताजमा सुरु भएको उक्त शिष्टाचार भेटमा नेपाल-भारतबिचको द्विपक्षीय सम्बन्ध, आपसी हित र साझा चासोका विविध आयामबारे प्रारम्भिक कुराकानी भएको छ।
प्रधानमन्त्री शाह आइतबार नयाँ दिल्ली अवतरण गरेलगत्तै भारतीय पक्षसँगको उच्चस्तरीय भेटवार्ताको शृङ्खला औपचारिक रूपमा अघि बढेको हो। विदेशमन्त्री जयशंकरले होटल ताज पुगेर प्रधानमन्त्री शाहलाई न्यानो स्वागत गर्दै भ्रमणको सफलताको शुभकामना व्यक्त गरेका थिए। भेटमा दुई देशबिच लामो समयदेखि कायम रहँदै आएको ऐतिहासिक र कूटनीतिक सम्बन्धलाई थप सुदृढ बनाउने विषयमा केन्द्रित रहेर छलफल अघि बढाइएको छ।
भ्रमण कार्यतालिका अनुसार विदेशमन्त्री जयशंकरसँगको भेटवार्तापश्चात् प्रधानमन्त्री शाहको अन्य उच्चपदस्थ भारतीय नेतृत्वसँग पनि भेटघाट तय गरिएको छ। भ्रमणका क्रममा सीमा व्यवस्थापन, व्यापार तथा पारवहन, ऊर्जा सहकार्य, कनेक्टिभिटी विस्तार र विकास आयोजनाहरूको प्रभावकारी कार्यान्वयनका विषयमा गम्भीर छलफल हुने जनाइएको छ।
नेपालको तर्फबाट उच्चस्तरीय प्रतिनिधिमण्डलको नेतृत्व गर्दै भारत पुगेका प्रधानमन्त्री शाहले यस भ्रमणले दुई मुलुकबिचको जनस्तरको सम्बन्ध तथा आर्थिक साझेदारीलाई नयाँ उचाइमा पुर्याउने विश्वास व्यक्त गरेका छन्। दुई देशबिच सौहार्दपूर्ण वातावरणमा भएको यस प्रारम्भिक संवादले आगामी उच्चस्तरीय वार्ताहरूका लागि सकारात्मक वातावरण निर्माण गरेको बताइएको छ।




