काठमाडौँ — प्रधानमन्त्री पुष्पकमल दाहालले आगामी आर्थिक वर्षको बजेट पारित गर्नेबित्तिकै छिमेकी मुलुक भारतको भ्रमण गर्ने भएका छन् । दाहाल तेस्रो पटक प्रधानमन्त्री नियुक्त भएपछि पहिलो पटक भारत भ्रमणमा जान लागेका हुन् । भ्रमणको औपचारिक निर्णय भइसकेको छैन । तर परराष्ट्र मन्त्रालयले प्रधानमन्त्रीको भ्रमणको तयारी अघि बढाएको छ ।
परराष्ट्र मन्त्रालय स्रोतका अनुसार प्रधानमन्त्री दाहालले जेठ १७ देखि २० गतेसम्म भारत भ्रमण गर्नेबारे छलफल भइरहेको छ । प्रधानमन्त्रीको भारत भ्रमणको तयारीलाई लिएर परराष्ट्रमन्त्री एनपी साउदले छलफल तीव्र पारेका छन् । उनले पूर्व परराष्ट्रमन्त्रीहरू, पूर्वराजदूतहरू र पूर्व सचिवहरूसँग छलफल गरेका छन् ।
परराष्ट्रमन्त्री साउदले शुक्रबार प्रधानमन्त्री दाहालको भ्रमणका विषयमा पूर्व परराष्ट्रमन्त्रीहरूसँग छलफल गरे । परराष्ट्र मन्त्रालयमा भएको छलफलमा पूर्व परराष्ट्रमन्त्रीहरू सुजाता कोइराला, रघुवीर महासेठ, प्रकाशचन्द्र लोहनी र भेषबहादुर थापा सहभागी थिए। पूर्व परराष्ट्रमन्त्रीहरुसँग प्रधानमान्त्रीको भारत भ्रमणका क्रममा नेपालका तर्फबाट उठाउनु पर्ने विषयवस्तुका बारेमा छलफल गरिएको परराष्ट्रमन्त्री साउदले बताए । उनले व्यापार, वाणिज्य, जलस्रोत, सिमाना, पारवहन, पर्यटन तथा सांस्कृतिक सम्बन्धसागै जनस्तरको सम्बन्धबारे छलफल भएको पनि बताए।
परराष्ट्रमन्त्री साउदले यसअघि बिहीबार पूर्वराजदूत र पूर्वसचिवहरुसँग छलफल गरेका थिए। छलफलमा पूर्वराजदूतद्वय लोकराज बराल, दिनेश भट्टराई तथा पूर्वसचिवहरु दुर्गा भट्टराई, मधुरमण आचार्य, मदन भट्टराईसँग छलफल गरिएको मन्त्री साउदका स्वकीय सचिव दीपक जोशीले जानकारी दिए।
