काठमाडौँ । सम्पत्ति शुद्धीकरणको कसुरमा पक्राउ परेका पूर्वमन्त्री दीपक खड्काको अनुसन्धान फाइल सम्पत्ति शुद्धीकरण अनुसन्धान विभागले थप प्रक्रियाका लागि अख्तियार दुरुपयोग अनुसन्धान आयोगमा पठाएको छ। विभागले सोमबार खड्काविरुद्ध सङ्कलन भएका प्रारम्भिक प्रमाणसहितको फाइल टङ्गालस्थित आयोगको कार्यालयमा हस्तान्तरण गरेको हो। फाइल बुझाए लगत्तै गृहमन्त्री सुधन गुरुङले अख्तियार पुगेर प्रमुख आयुक्त प्रेम राईसँग भेट गरी अनुसन्धानलाई तीव्रता दिनेबारे छलफल गर्नुभएको छ।
पूर्वमन्त्री खड्कालाई गत चैत १५ गते नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको थियो। उहाँमाथि सार्वजनिक ओहोदाको दुरुपयोग गरी भ्रष्टाचार गरेको र अकुत सम्पत्ति आर्जन गरेको आरोपमा अख्तियारमा पहिले नै उजुरी परेकाले विभागले फाइल हस्तान्तरण गरेको हो। सम्पत्ति शुद्धीकरण निवारण ऐनको २०८० को संशोधनअनुसार, मुख्य कसुर (भ्रष्टाचार) को अनुसन्धान गर्ने निकायले मुद्दा अघि बढाएपछि मात्र सम्पत्ति शुद्धीकरणमा थप अनुसन्धान र अभियोजन गर्ने बाटो खुल्ने कानुनी व्यवस्था छ।
खड्का यसअघि केपी शर्मा ओली नेतृत्वको सरकारमा ऊर्जा, जलस्रोत तथा सिँचाइमन्त्री र पुष्पकमल दाहाल ‘प्रचण्ड’ नेतृत्वको सरकारमा खानेपानी राज्यमन्त्री हुनुहुन्थ्यो। दुई पटक सांसद भइसकेका खड्कामाथि अब अख्तियारले भ्रष्टाचार निवारण ऐनअनुसार अनुसन्धान अघि बढाउनेछ। विभागले फाइल पठाएपछि अब खड्कालाई अख्तियारकै हिरासतमा राखेर म्याद थप गर्ने तयारी गरिएको छ। बालेन्द्र शाह नेतृत्वको सरकारले सुशासन र भ्रष्टाचार नियन्त्रणलाई प्राथमिकतामा राखेका कारण यो अनुसन्धानलाई निकै चासोका साथ हेरिएको छ।
