काभ्रेपलाञ्चोक । बीपी राजमार्गअन्तर्गत काभ्रेको नमोबुद्ध नगरपालिका–२, सेल्फीडाँडामा यात्रुवाहक माइक्रोबस दुर्घटना हुँदा तीन जना घाइते भएका छन् । इलामबाट यात्रु लिएर काठमाडौँतर्फ आउँदै गरेको बा ३ ख ८३५९ नम्बरको हाइस माइक्रोबस अनियन्त्रित भई सडकबाट करिब २५० मिटर तल भीरमा खसेको हो ।
दुर्घटनाको खबर प्राप्त हुनासाथ भकुण्डेबेँसीस्थित नेपाली सेना, नेपाल प्रहरी तथा अन्य सुरक्षा निकायको संयुक्त टोली तत्काल उद्धार कार्यमा खटिएको थियो । रातिको अँध्यारो र अत्यन्तै अप्ठ्यारो भीर भएका कारण नेपाली सेनाले अत्याधुनिक थर्मल ड्रोनको सहायताले घाइतेहरूको अवस्थिति पत्ता लगाई भिरबाट सकुशल बाहिर निकालेको सुरक्षा निकायले जनाएको छ ।
उद्धार गरिएका तीनै जना घाइतेहरूलाई मेथिनकोट अस्पतालको एम्बुलेन्समार्फत प्राथमिक उपचारपछि थप उपचारका लागि धुलिखेल अस्पताल पठाइएको छ । घाइतेहरूको हाल धुलिखेल अस्पतालमा उपचार भइरहेको र उनीहरूको अवस्था खतरामुक्त रहेको अस्पताल स्रोतले जनाएको छ ।
सडकको तीव्र मोड र रातको समयमा चालकको नियन्त्रण गुम्दा गाडी भीरमा खसेको हुनसक्ने प्रारम्भिक अनुमान गरिएको छ । दुर्घटनाबारे जिल्ला प्रहरी कार्यालय काभ्रेले थप अनुसन्धान अघि बढाएको छ ।
