काठमाडौँ । नेपाली कांग्रेसका नवनिर्वाचित सभापति गगनकुमार थापाले राजनीतिक दलहरू कुनै नेताविशेषको निजी कम्पनी नभई आम नागरिक र कार्यकर्ताको साझा सार्वजनिक सम्पत्ति भएको स्पष्ट पारेका छन् । शुक्रबार काठमाडौँमा आयोजित विशेष अभिनन्दन तथा सम्मान कार्यक्रमलाई सम्बोधन गर्दै सभापति थापाले पार्टीलाई व्यक्तिगत स्वार्थ र संकीर्णताबाट माथि उठाउनुपर्नेमा जोड दिएका हुन् ।
सभापति थापाले दलहरू सार्वजनिक सम्पत्ति (पब्लिक प्रोपर्टी) भएकाले यसमा हरेक कार्यकर्ता तथा आम जनताको समान अधिकार र अपनत्व रहने बताए । ‘कांग्रेस कुनै नेताको प्राइभेट कम्पनी होइन, यो लाखौँ जनताको बलिदान र आस्था जोडिएको सार्वजनिक धरोहर हो,’ थापाले भने, ‘यसको मर्यादा र सिद्धान्तलाई व्यक्तिविशेषको आचरणसँग मिसाएर हेर्न मिल्दैन ।’
पार्टी नेतृत्व र नेताहरूको आचरणमाथि उठ्ने प्रश्नहरूबारे प्रस्ट पार्दै उनले खराब आचरण व्यक्तिको हुने तर सिङ्गो पार्टीको नहुने तर्क गरे । ‘यदि भोलि मेरो व्यक्तिगत आचरण वा क्रियाकलापमाथि कुनै प्रश्न उठ्यो भने त्यसको जवाफदेही र प्रतिवाद मैले स्वयं गर्नुपर्छ, पार्टीले होइन,’ सभापति थापाले भने, ‘व्यक्तिगत कमजोरी वा विचलनको भारी पार्टीलाई बोकाउने प्रवृत्तिको अब अन्त्य हुनुपर्छ ।’
सभापति थापाले कांग्रेसभित्र वर्षौँदेखि जरा गाडेर बसेका विसङ्गति, विकृति र गुटगत कमजोरीहरूलाई ‘फोहोर’ को संज्ञा दिँदै त्यसलाई निर्मम भएर सफा गर्दै अघि बढ्ने दृढता व्यक्त गरे । पार्टीभित्रका आन्तरिक समस्याहरूलाई सुधार गरेर कांग्रेसलाई नयाँ युगको आवश्यकता सुहाउँदो र जनउत्तरदायी राजनीतिक शक्तिका रूपमा रूपान्तरण गर्ने उनको सङ्कल्प छ ।
