काठमाडौँ । हाल नेपालमा पश्चिमी वायुको सामान्य प्रभाव कायमै रहेको जल तथा मौसम विज्ञान विभागले जनाएको छ । पश्चिमी वायुको प्रभावका कारण आज शनिबार देशका पहाडी तथा हिमाली भू-भागमा आंशिक बदली रही बाँकी भू-भागमा मौसम मुख्यतया सफा रहने पूर्वानुमान गरिएको छ ।
मौसम पूर्वानुमान महाशाखाका अनुसार दिउँसो कोशी, बागमती र गण्डकी प्रदेशका पहाडी तथा हिमाली भू-भागमा आंशिक बदलीको अवस्था रहनेछ । अन्य भू-भागमा भने घाम लाग्ने र मौसम सफा रहनेछ । कोशी र गण्डकी प्रदेशका उच्च हिमाली भेगका एक-दुई स्थानमा मेघगर्जन वा हल्का हिमपातको सामान्य सम्भावना रहेको छ ।
रात्रिको समयमा पनि देशभरको मौसम सामान्यतया सफादेखि आंशिक बदली रहनेछ । तराईका केही जिल्लाहरू तथा उपत्यकाका नदी तटीय क्षेत्रहरूमा बिहानीपख हल्का हुस्सु र कुहिरो लाग्ने सम्भावना रहेकाले सडक तथा हवाई यातायातमा सतर्कता अपनाउन महाशाखाले अनुरोध गरेको छ ।
पछिल्ला दिनहरूमा तापक्रम क्रमशः घट्दै गएकाले बिहान र बेलुकी चिसो बढ्न थालेको छ । चिसोबाट बच्न आवश्यक सतर्कता अपनाउन तथा मौसमी स्वास्थ्य सावधानी अपनाउन विज्ञहरूले सुझाव दिएका छन् ।
