काठमाडौँ । नयाँ वर्ष २०८३ को उल्लासलाई थप उत्साहजनक बनाउन नेपाल टेलिकमले आफ्ना ग्राहकका लागि विशेष ‘न्यु इयर अफर’ सार्वजनिक गरेको छ। सरकारी स्वामित्वको दूरसञ्चार कम्पनीले प्रिपेड तथा पोस्टपेड मोबाइल प्रयोगकर्ताका लागि सस्तो र उच्च गतिको इन्टरनेट प्याकेजहरू ल्याएको हो।
टेलिकमले यसपटक ‘न्यु इयर लाइट’ र ‘न्यु इयर प्रिमियम’ गरी दुई आकर्षक विकल्पहरू प्रस्तुत गरेको छ। ‘न्यु इयर लाइट’ प्याकेज अन्तर्गत ग्राहकले मात्र ४९९ रुपैयाँमा ३० दिनसम्म प्रतिदिन ५ जीबी उच्च गतिको डाटा प्राप्त गर्नेछन्। दैनिक ५ जीबीको सीमा सकिए पनि २ एमबीपीएसको गतिमा महिनाभर अनलिमिटेड डाटा चलाउन सकिने व्यवस्था मिलाइएको छ।
त्यसैगरी, बढी डाटा आवश्यक पर्ने ग्राहकका लागि ६९९ रुपैयाँमा ‘न्यु इयर प्रिमियम’ प्याकेज ल्याइएको छ, जसमा प्रतिदिन १० जीबी डाटा उपलब्ध हुनेछ। यसमा पनि दैनिक कोटा सकिएपछि ३ एमबीपीएसको गतिमा अनलिमिटेड डाटा प्रयोग गर्न पाइनेछ। यो अफर आज चैत ३० गतेदेखि सुरु भई वैशाख २ गतेसम्म मात्र खरिद गर्न सकिने प्रवक्ता रवीन्द्र मानन्धरले जानकारी दिनुभयो।
बालेन्द्र शाह नेतृत्वको सरकारले डिजिटल साक्षरता र सस्तो कनेक्टिभिटीलाई प्राथमिकता दिइरहेका बेला टेलिकमको यो ‘अनलिमिटेड’ शैलीको अफरले प्रयोगकर्तालाई ठूलो राहत दिने अपेक्षा गरिएको छ। इच्छुक ग्राहकले *१४१५*११# डायल गरेर वा नेपाल टेलिकमको एपमार्फत यो सेवा सुचारु गर्न सक्नेछन्।
