काठमाडाैं । पेरिसका लागि उडेको एउटा निजी जेट अमेरिकाको मेनस्थित ब्याङ्गोरमा हिउँआँधीका बीच दुर्घटना हुँदा जहाजमा सवार ७ जनाको मृत्यु भएको छ ।
संघीय उड्डयन प्राधिकरणको प्रारम्भिक प्रतिवेदनले सुरुमा सात जनाको मृत्यु र एक जना गम्भीर घाइते भएको बताए तापनि पछि उक्त निकायले यात्रु संख्याको आधिकारिक जानकारीका लागि विमानस्थलको तथ्यांकलाई नै आधार मान्ने बताएको छ।
यस घटनापश्चात ब्याङ्गोर अन्तर्राष्ट्रिय विमानस्थल आगामी बुधबार दिउँसोसम्मका लागि बन्द गरिएको छ।
ह्युस्टनस्थित एउटा कम्पनीको नाममा दर्ता रहेको उक्त बम्बार्डियर च्यालेन्जर ६५० बिजनेस जेट ह्युस्टनबाट उडेर साँझ ब्याङ्गोर अवतरण गरेको थियो। उडान ट्र्याकिङ तथ्यांक अनुसार यो विमान ब्याङ्गोरबाट फ्रान्सको पेरिस-भ्याट्री विमानस्थलका लागि प्रस्थान गर्ने तयारीमा थियो। उड्नुअघि विमानलाई जमेको हिउँ हटाउने प्रक्रियाका लागि तोकिएको क्षेत्रमा लगिएको थियो। उत्तर-पूर्वी क्षेत्रमा शक्तिशाली हिउँआँधी चलिरहेको र अत्यधिक चिसोका कारण दृश्यता निकै कम भएको समयमा यो दुर्घटना भएको हो।
विमानस्थलको एयर ट्राफिक कन्ट्रोल रेकर्डिङका अनुसार धावनमार्ग ३३ बाट उडान भर्ने अनुमति पाएको दुई मिनेटमै नियन्त्रकले आपत्कालीन सन्देश जारी गर्दै सबै उडानहरू रोक्न निर्देशन दिएका थिए।
सोही समयमा विमान उल्टो परेको र आगो लागेको जानकारी प्राप्त भएको थियो। एफएएको प्रतिवेदनले पनि विमान प्रस्थान गर्ने क्रममा अज्ञात कारणले दुर्घटना भई उल्टो अवस्थामा खसेको र आगलागी भएको पुष्टि गरेको छ।
दुर्घटना हुनुअघि सोही विमानस्थलबाट उड्न लागेका अन्य दुई व्यावसायिक विमानका पाइलटहरूले त्यहाँको मौसम र हिउँको अवस्थाबारे चिन्ता व्यक्त गरेको अडियो रेकर्डमा सुनिएको छ।
