काठमाडौँ । मौसम पूर्वानुमान महाशाखाले २०८२ माघ २४ गते शनिबारको मौसम पूर्वानुमान सार्वजनिक गरेको छ। जसअनुसार कोशी र गण्डकी प्रदेशका केही क्षेत्रमा हल्का वर्षा र हिमपातको सम्भावना देखिएको छ भने तराईका जिल्लाहरूमा हुस्सुको प्रभाव कायमै रहनेछ।
आज दिउँसो कोशी र गण्डकी प्रदेशका हिमाली भू-भागमा साधारणतया बादल लाग्ने र ती क्षेत्रका एक-दुई स्थानमा हल्का वर्षाका साथै हल्का हिमपात हुन सक्ने महाशाखाले जनाएको छ। देशका बाँकी पहाडी भू-भागमा भने आंशिक बदली रहनेछ। तराईका धेरैजसो स्थानमा बिहानीपख बाक्लो कुहिरो लाग्ने र केही स्थानमा दिउँसोसम्म हुस्सु रहने सम्भावना छ।
रातिको समयमा कोशी, बागमती र गण्डकी प्रदेशका पहाडी तथा हिमाली भू-भागमा आंशिक बदली रहनेछ। राति पनि कोशी र गण्डकीका उच्च पहाडी तथा हिमाली भेगमा एक-दुई स्थानमा हल्का हिमपात र वर्षाको सम्भावना रहेको छ। लुम्बिनी, कर्णाली र सुदूरपश्चिम प्रदेशको हिमाली तथा पहाडी क्षेत्रमा भने राति मौसम मुख्यतया सफा रहनेछ। तराईका थोरै स्थानहरूमा राति पनि हुस्सु लाग्ने भएकाले चिसो अझै बढ्न सक्ने देखिन्छ।
हुस्सु र कुहिरोका कारण सडक तथा हवाई यातायात प्रभावित हुन सक्ने र चिसोले स्वास्थ्यमा असर पार्न सक्ने भन्दै महाशाखाले आवश्यक सतर्कता अपनाउन सबैमा अनुरोध गरेको छ।
