काठमाडौँ । हाल नेपालमा पश्चिमी वायु र स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। यसको प्रभावका कारण अहिले कोशी, बागमती र गण्डकी प्रदेशका पहाडी तथा हिमाली भू-भागमा आंशिक बदली रहेको छ भने अन्य क्षेत्रको मौसम मुख्यतया सफा छ।
महाशाखाका अनुसार आज दिउँसो कोशी प्रदेशका पहाडी र हिमाली भू-भागमा साधारणतया बादल लाग्नेछ। कोशी प्रदेशकै पहाडी तथा हिमाली क्षेत्रका एक-दुई स्थानमा चट्याङ्गसहित हल्का वर्षाको सम्भावना रहेको छ। बागमती र गण्डकी प्रदेशका पहाडी तथा हिमाली भू-भागमा आंशिक बदली रहे पनि बाँकी क्षेत्रको मौसम सफा रहनेछ। तराईका केही स्थानमा बिहानको समयमा हुस्सु लाग्ने देखिएको छ।
आज राति पनि कोशी र गण्डकी प्रदेशका पहाडी तथा हिमाली भू-भागमा आंशिक बदली रहनेछ भने अन्य भू-भागमा मौसम सफा रहने महाशाखाले जनाएको छ। रातिको समयमा तराईका थोरै स्थानहरूमा तुवाँलो लाग्न सक्ने सम्भावना छ।
