काठमाडौँ । प्रतिनिधिसभा निर्वाचन २०८२ को समानुपातिकतर्फको मतगणना अब अन्तिम चरणमा पुगेको छ। निर्वाचन आयोगको पछिल्लो विवरण अनुसार, हालसम्म १ करोड ७ लाख ३० हजार ५५१ मत गणना भइसकेको छ। यस मतगणनामा राष्ट्रिय स्वतन्त्र पार्टी (रास्वपा) ले आफ्नो अग्रतालाई फराकिलो बनाउँदै ५१ लाख ३५ हजार ६२१ मत प्राप्त गरी ऐतिहासिक कीर्तिमान कायम गरेको छ।
प्रत्यक्षतर्फ १२५ सिट जितेर बहुमतको नजिक पुगेको रास्वपालाई समानुपातिक मतले थप बलियो बनाएको छ। मतगणनाको पछिल्लो परिणाम अनुसार, दोस्रो स्थानमा रहेको नेपाली कांग्रेसले १७ लाख ४७ हजार ७३७ मत र तेस्रो स्थानमा रहेको नेकपा एमालेले १४ लाख ४८ हजार ३१८ मत प्राप्त गरेका छन्। त्यसैगरी, नेपाली कम्युनिस्ट पार्टी (नेकपा) ले ८ लाख ३ हजार ६२७ मतका साथ चौथो स्थान कायम राखेको छ।
साना दलहरूको प्रतिस्पर्धा: पाँचौँ स्थानमा रहेको श्रम संस्कृति पार्टीले ३ लाख ७८ हजार ५८७ मत ल्याएर थ्रेसहोल्ड कटाउने निश्चित गरेको छ। राष्ट्रिय प्रजातन्त्र पार्टी (राप्रपा) ३ लाख २९ हजार ४५७ मतसहित छैटौँ स्थानमा छ। यसपटकको निर्वाचनमा पुरानो प्रभाव भएका मधेशवादी दलहरू भने निकै पछि परेका छन्; जसपा नेपालले १ लाख ७४ हजार ३०६ र जनमत पार्टीले ७८ हजार ९४९ मत मात्र प्राप्त गरेका छन्। राष्ट्रिय परिवर्तन पार्टीले भने १ लाख ७१ हजार ४९७ मत प्राप्त गरेको छ।
