काठमाडौँ । काठमाडौँबाट खोटाङका लागि उडेको एयर डाइनेस्टीको हेलिकप्टर आज (बुधबार) खोटाङको केपिलासगढी गाउँपालिका-२, बालाबेंसीमा दुर्घटनामा परेको छ। अवतरण गर्ने क्रममा असन्तुलित भई हेलिकप्टर पल्टिएको नेपाल नागरिक उड्डयन प्राधिकरण (क्यान) ले पुष्टि गरेको छ। ‘९ एन–एएफक्यू’ कलसाइन भएको उक्त हेलिकप्टरमा सवार चालक दलका सदस्यसहित सबै ६ जना सुरक्षित रहेका छन्।
प्राधिकरणका अनुसार हेलिकप्टरमा क्याप्टेन सबिन थापासहित ५ जना यात्रु सवार थिए। दुर्घटनामा परी यात्रु काजीबहादुर राईलाई सामान्य चोट लागेको छ भने अन्य सबैको अवस्था सामान्य रहेको छ। त्रिभुवन अन्तर्राष्ट्रिय विमानस्थलबाट बिहान ११:०० बजे उडेको उक्त हेलिकप्टर ११:५१ बजे गन्तव्यमा अवतरण गर्ने क्रममा दुर्घटनामा परेको थियो। प्रारम्भिक जानकारी अनुसार उच्च हावाको वेग र धुलोका कारण अवतरणका क्रममा सन्तुलन बिग्रिएको हुन सक्ने अनुमान गरिएको छ।
नागरिक उड्डयन प्राधिकरणका सूचना अधिकारी ज्ञानेन्द्र भुलका अनुसार दुर्घटनालगत्तै काठमाडौँबाट अर्को उद्धार हेलिकप्टर ‘९ एन-एएनए’ खोटाङ पठाइएको थियो। उद्धार टोलीले पाइलट र घाइते यात्रुलाई थप उपचार र परीक्षणका लागि काठमाडौँ ल्याइसकेको छ। सामाजिक सञ्जालमा उक्त हेलिकप्टरले शव बोकेको भन्ने हल्ला फैलिए पनि प्राधिकरणले त्यसलाई आधिकारिक रूपमा खण्डन गर्दै ती हल्लाहरू निराधार रहेको स्पष्ट पारेको छ।
खोटाङका प्रमुख जिल्ला अधिकारी रेखा कँडेलले पनि सबै यात्रुहरू सुरक्षित रहेको र आवश्यक उद्धार कार्य समयमै सम्पन्न भएको जानकारी दिनुभएको छ। हेलिकप्टर दुर्घटनाको यथार्थ कारण पत्ता लगाउन प्राविधिक टोलीले अनुसन्धान सुरु गर्ने तयारी गरेको छ। पछिल्लो समय मौसममा आएको फेरबदल र भौगोलिक कठिनाइका कारण हवाई सुरक्षामा चुनौती थपिएको भन्दै उड्डयन क्षेत्रमा सचेतता अपनाउन आग्रह गरिएको छ।
