काठमाडौँ । नेपाली कांग्रेसको १५औँ महाधिवेशनअन्तर्गत गण्डकी प्रदेशको प्रतिनिधित्व गर्ने केन्द्रीय सदस्यहरूको अन्तिम मतपरिणाम सार्वजनिक भएको छ । पार्टी केन्द्रीय कार्यालय सानेपामा सम्पन्न मतगणनाअनुसार खुला केन्द्रीय सदस्यतर्फ किरणबाबु श्रेष्ठ, रेशमबहादुर बानियाँ र खुमाप्रसाद अर्याल निर्वाचित भएका छन् ।
त्यसैगरी, गण्डकी प्रदेशको महिला केन्द्रीय सदस्य पदमा सरस्वती अर्याल तिवारी अत्यधिक मतका साथ विजयी भएकी छन् । उनले निकटतम प्रतिस्पर्धीलाई फराकिलो मतान्तरले पराजित गर्दै केन्द्रीय कार्यसमितिमा स्थान सुरक्षित गरेकी हुन् ।
पार्टीको ३५ वर्षमुनिको युवा कोटातर्फ गण्डकी प्रदेशबाट सर्वाधिक मत प्राप्त गर्दै सुभाष पौडेल केन्द्रीय सदस्यमा निर्वाचित भएका छन् । यस्तै, ३५ वर्षमुनिको महिला क्लस्टरबाट डा. कला पन्त केन्द्रीय सदस्यमा विजयी भएकी छन् ।
यससँगै कांग्रेसको केन्द्रीय नेतृत्वमा गण्डकी प्रदेशबाट अनुभवी र युवा नेतृत्वको सशक्त प्रतिनिधित्व सुनिश्चित भएको निर्वाचन समितिले जनाएको छ । नवनिर्वाचित सदस्यहरूले पार्टी सङ्गठनलाई तल्लो तहसम्म सुदृढ र एकताबद्ध बनाउन सक्रिय भूमिका निर्वाह गर्ने प्रतिबद्धता जनाएका छन् ।
