काठमाडौँ । नवनिर्वाचित प्रतिनिधिसभा सदस्य महावीर पुनले नेकपा एमालेकी नेत्री एवं समानुपातिक सांसद पद्मा अर्यालको पछिल्लो अभिव्यक्तिप्रति कडा आक्रोश व्यक्त गर्नुभएको छ। नयाँ राजनीतिक शक्ति र युवा नेताहरूलाई ‘तह लगाउने’ भन्ने अर्यालको टिप्पणीप्रति लक्षित गर्दै पुनले सामाजिक सञ्जालमार्फत तीखो प्रतिक्रिया जनाउनुभएको हो।
पुनले अर्याललाई आफ्ना पुराना नेताहरूले सिकाए जस्तो ‘स्वाँठ र मूर्ख’ नबन्न सुझाव दिँदै अहिलेका युवाहरू पुराना पुस्ताका नेताहरूभन्दा सयौँ गुणा बढी जान्ने र चलाख भइसकेको दाबी गर्नुभएको छ। “तिमीले नयाँ नेताहरूलाई कसरी तह लगाउने भनेर भन्दै गर्दा, तिमी जस्ता पुराना सोच भएका गफाडी नेताहरूलाई कसरी तह लगाउने भन्ने उपाय अहिलेका युवा नेताहरूलाई राम्रोसँग थाहा छ,” पुनले लेख्नुभएको छ। उहाँले गत आम निर्वाचनमा नेपाली जनताले पुराना दलहरूलाई उचित जवाफ दिइसकेको स्मरण समेत गराउनुभएको छ।
अर्यालको राजनीतिक हैसियतमाथि प्रश्न उठाउँदै पुनले उहाँलाई ‘चाकरी गरेर समानुपातिक कोटामा आएकी नेत्री’ को संज्ञा दिनुभएको छ। उहाँले थप भन्नुभएको छ, “चाकरी गरेर समानुपातिक कोटामा आएका तिमी जस्ता कथित पुराना सोचका नेताहरू त्यसरी साह्रै अहङ्कारी बन्नु हुँदैन।” पुनले अहङ्कार त्यागेर विवेकपूर्ण तरिकाले नयाँ शक्तिसँग सहकार्य गर्न समेत सुझाउनुभएको छ।
विगत ३५ वर्षमा संसार धेरै अगाडि बढिसकेको उल्लेख गर्दै पुनले सन् १९८९ (२०४६ साल) देखि अहिलेसम्म पृथ्वीले सूर्यको धेरै फन्को मारिसकेको र समय धेरै बदलिएको यथार्थ बुझ्न अर्याल र उहाँका समकालीन नेताहरूलाई आग्रह गर्नुभएको छ। नयाँ र पुराना शक्तिबीचको यो वाकयुद्धले नेपाली राजनीतिमा बदलिँदो शक्ति सन्तुलनलाई प्रस्ट पारेको छ।
