काठमाडौँ । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवाले पार्टीको आधिकारिकतासम्बन्धी विवादमा ठूलो आर्थिक चलखेल भएको भन्दै वर्तमान संस्थापन पक्षमाथि कडा प्रहार गरेका छन्। निर्वाचन आयोगको निर्णय प्रक्रियामाथि गम्भीर प्रश्न उठाउँदै देउवाले आर्थिक प्रभाव र दबाबका भरमा पार्टीको आधिकारिकता खोस्ने प्रपञ्च रचिएको आरोप लगाएका हुन्।
शनिबार काठमाडौँमा आयोजित नेपाली कांग्रेस काठमाडौँ जिल्ला समितिको १५औँ जिल्ला अधिवेशनलाई सम्बोधन गर्दै पूर्वसभापति देउवाले पार्टी सभापति गगनकुमार थापालाई लक्षित गर्दै चर्को आक्रोश व्यक्त गरे। उनले पैसाको बलमा पार्टीको विरासत र मूल्यमान्यता लिलाम गर्नेहरूले कहिल्यै पनि कांग्रेसको रक्षा गर्न नसक्ने स्पष्ट पारे।
‘१८ करोडको अभिव्यक्ति र आयुक्तलाई धम्कीबारे छानबिन होस्’
सम्बोधनका क्रममा देउवाले निर्वाचन आयोगको निर्णय प्रक्रिया निष्पक्ष नरहेको दाबी गरे। उनले निर्वाचन आयुक्तहरूलाई ज्यान मार्ने धम्की दिएर एकपक्षीय निर्णय गराइएको भन्ने सूचनाहरू सार्वजनिक भएको उल्लेख गर्दै यस विषयमा तत्काल निष्पक्ष छानबिन हुनुपर्ने माग गरे।
‘एक व्यक्तिले १८ करोड रुपैयाँ दिएको भन्ने कुरासमेत सार्वजनिक रूपमा बाहिर आएको छ,’ देउवाले भने, ‘के पैसाको भरमा पार्टीको इतिहास र लाखौँ कार्यकर्ताको पसिना साट्न मिल्छ? पैसामा पार्टी बेच्नेले कुनै पनि हालतमा कांग्रेस जोगाउन सक्दैन।’ उनले कांग्रेसको आदर्श, राजनीतिक मूल्य र लोकतान्त्रिक पहिचान कुनै पनि मोलमा बिक्री हुन नसक्ने दृढता व्यक्त गरे।
अदालतबाट न्याय पाउने र रुख चिह्न जोगिने विश्वास
देउवाले आफूले लामो राजनीतिक जीवनमा सबै पद र प्रतिष्ठा प्राप्त गरिसकेको स्मरण गराउँदै अबको समय पदका लागि नभई पार्टी र मुलुकको समृद्धिका लागि समर्पित रहने बताए। उनले पार्टीको आधिकारिकता विवाद हाल अदालतमा विचाराधीन रहेको स्मरण गराउँदै न्यायपालिकाबाट निष्पक्ष न्याय आउने विश्वास व्यक्त गरे।
‘कांग्रेसको ऐतिहासिक चुनाव चिह्न रुख कायम रहनेमा म पूर्ण विश्वस्त छु, यसका लागि हामी कुनै पनि सम्झौता नगरी दृढतापूर्वक अघि बढ्नेछौँ,’ देउवाले भने। उनले कुनै व्यक्तिको आर्थिक प्रलोभनमा नभई कांग्रेस आफ्नै विधि, विधान र लाखौँ निष्ठावान् कार्यकर्ताको विश्वासमा चल्नुपर्नेमा जोड दिए।
