काठमाडौँ । बालेन्द्र शाह नेतृत्वको सरकारले देशको कार्यक्षमता वृद्धि र इन्धन खपत न्यूनीकरणका लागि सातामा दुई दिन (शनिबार र आइतबार) सार्वजनिक बिदा दिने महत्वपूर्ण निर्णय गरेको छ। आइतबार बसेको मन्त्रिपरिषद् बैठकले भोलि सोमबारदेखि नै लागु हुने गरी सरकारी कार्यालय र सबै शैक्षिक संस्थाहरूमा दुई दिने बिदा दिने निर्णय गरेको सरकारका प्रवक्ता एवं शिक्षामन्त्री सस्मित पोखरेलले जानकारी दिनुभयो।
बैठकले मुलुकको अर्थतन्त्र र प्रविधिको विकासका लागि दुई ठूला वैदेशिक ऋण सहायता स्वीकार गर्ने निर्णय समेत गरेको छ। ‘डिजिटल नेपाल ट्रान्सफरमेसन’ परियोजनाका लागि एसियाली विकास बैंक र विश्व बैंकबाट ९ करोड अमेरिकी डलर तथा दिगो र समावेशी वित्त परियोजनाका लागि विश्व बैंकबाट ९ करोड ५० लाख अमेरिकी डलर सहुलियतपूर्ण ऋण लिन सरकारले स्वीकृति दिएको छ। यी परियोजनाले नेपालको डिजिटल पूर्वाधार र वित्तीय स्थायित्वमा ठूलो सहयोग पुर्याउने अपेक्षा गरिएको छ।
यसैगरी, मन्त्रिपरिषद्ले वातावरण संरक्षण र ऊर्जा आत्मनिर्भरतालाई ध्यानमा राख्दै डिजेल तथा पेट्रोलबाट सञ्चालन हुने सवारीसाधनलाई विद्युतीय वाहन (EV) मा रूपान्तरण गर्ने व्यवस्था मिलाउने ऐतिहासिक निर्णय गरेको छ। यसका लागि आवश्यक कानुनी र प्राविधिक पूर्वाधार छिट्टै तयार पारिनेछ। बैठकले आगामी नयाँ शैक्षिक सत्र २०८३ वैशाख १५ गतेदेखि नै सञ्चालन गर्ने निर्णय गर्दै शिक्षा क्षेत्रको क्यालेन्डरमा समेत सुधार गरेको छ।
अन्य निर्णयहरूमा, राष्ट्रिय समाचार समिति (रासस) का कार्यकारी अध्यक्ष धर्मेन्द्र झाले दिएको राजीनामा स्वीकृत गरिएको छ भने सबै मन्त्रालय, सचिवालय र आयोगहरूको सङ्गठन तथा व्यवस्थापन सर्वेक्षण (O&M) गर्न पनि स्वीकृति दिइएको छ। ‘जेनजी’ आन्दोलनपछि बनेको यस सरकारले प्रशासनिक सुधार र वातावरणीय मुद्दालाई उच्च प्राथमिकतामा राखेको यो बैठकका निर्णयहरूबाट स्पष्ट देखिएको छ।
