काठमाडौँ । नेपाली कांग्रेसका सभापति गगन थापाले पार्टीको आधिकारिकतासम्बन्धी सर्वोच्च अदालतको फैसलालाई एकता र सुदृढीकरणको अवसरका रूपमा लिनुपर्ने बताउनुभएको छ। अदालतको निर्णय सार्वजनिक भएलगत्तै सामाजिक सञ्जाल फेसबुकमार्फत आफ्नो धारणा सार्वजनिक गर्दै उहाँले यसलाई कुनै पक्षको ‘जित वा हार’ भन्दा पनि पार्टीभित्रको विधि र लोकतान्त्रिक अभ्यासको जितका रूपमा व्याख्या गर्नुभएको छ।
सभापति थापाले अबको यात्रा कांग्रेसलाई फेरि बलियो बनाउने साझा यात्रा भएको उल्लेख गर्दै देश तथा विदेशमा रहेका सबै सदस्य र शुभेच्छुकहरूलाई सकारात्मक भूमिका खेल्न अपिल गर्नुभएको छ। नेतृत्वको हैसियतले पार्टीलाई एकताबद्ध बनाउने सबैभन्दा ठुलो जिम्मेवारी आफ्नै काँधमा रहेको स्वीकार गर्दै उहाँले त्यसका लागि आफू पूर्ण रूपमा सक्रिय रहने प्रतिबद्धता समेत जनाउनुभएको छ।
कांग्रेसको आगामी पन्ध्रौँ महाधिवेशनको प्रक्रिया अगाडि बढिसकेको जानकारी दिँदै थापाले यसलाई पार्टी रूपान्तरणको मुख्य आधार बनाउनुपर्नेमा जोड दिनुभएको छ। नयाँ पुस्ताको आकाङ्क्षा र अग्रजहरूको अनुभवलाई मिलाएर समुन्नत नेपाल निर्माणको नेतृत्व कांग्रेसले नै गर्नुपर्ने उहाँको भनाइ छ। अदालतको यो फैसलापछि कांग्रेसभित्रको लामो समयदेखिको नेतृत्व विवाद कानुनी रूपमा अन्त्य भएको छ।
