काठमाडौँ । हाल नेपालमा पश्चिमी र स्थानीय वायुका साथै पूर्वी भू-भाग नजिक रहेको न्यून चापीय प्रणालीको आंशिक प्रभावले मौसममा उल्लेखनीय फेरबदल आएको छ। जल तथा मौसम पूर्वानुमान महाशाखाका अनुसार आज देशका हिमाली र पहाडी भू-भागमा साधारणतया बदली रहनेछ भने बाँकी क्षेत्रमा आंशिक बादल लाग्नेछ।
आज दिउँसो कोशी, बागमती र गण्डकी प्रदेशका केही स्थानहरूमा तथा मधेस, लुम्बिनी, कर्णाली र सुदूरपश्चिमका पहाडी र हिमाली भू-भागका थोरै स्थानहरूमा चट्याङ्गसहित मध्यम वर्षा र हिमपातको सम्भावना रहेको छ। विशेष गरी कोशी र गण्डकी प्रदेशका पहाडी तथा हिमाली क्षेत्रका एक-दुई स्थानमा भारी वर्षा र हिमपात हुन सक्ने महाशाखाले चेतावनी दिएको छ।
आज राति पनि मौसममा सुधार हुने देखिँदैन। कोशी प्रदेशका धेरै स्थानहरूमा र मधेस, बागमती तथा गण्डकी प्रदेशका केही स्थानहरूमा वर्षाको सम्भावना कायमै छ। पहाडी क्षेत्रमा चट्याङ्ग र वर्षाको जोखिम रहेकाले सतर्कता अपनाउन महाशाखाले अनुरोध गरेको छ। हाल गण्डकी प्रदेशका एक-दुई स्थानमा हल्का वर्षा भइरहेको र तराईका भू-भागमा समेत आंशिक बदली रहेको मौसम बुलेटिनमा उल्लेख छ।
