काठमाडौँ । नेपाली कांग्रेसका प्रवक्ता देवराज चालिसेले बागमती प्रदेशका मुख्यमन्त्री एवं पार्टीका प्रदेश सभापति इन्द्र बानियाँमाथि सम्पत्ति शुद्धीकरण अनुसन्धान विभागले गरिरहेको अनुसन्धानबारे पार्टीको आधिकारिक धारणा सार्वजनिक गर्नुभएको छ। प्रवक्ता चालिसेले विधिको शासन लोकतन्त्रको आधारभूत सिद्धान्त भएको उल्लेख गर्दै कानुनको पालना गर्नु हरेक नागरिकको कर्तव्य भएको बताउनुभएको हो।
चालिसेले कानुनको दृष्टिमा सबै नागरिक समान हुने र कोही पनि कानुनभन्दा माथि नहुने स्पष्ट पार्नुभयो। मुख्यमन्त्री बानियाँले अनुसन्धानमा पूर्ण सहयोग गर्ने प्रतिबद्धता जनाइसकेको उल्लेख गर्दै उहाँले यसलाई लोकतान्त्रिक संस्कार र राजनीतिक परिपक्वताको संज्ञा दिनुभएको छ। प्रवक्ता चालिसेले राज्यका निकायहरूलाई अनुसन्धान निष्पक्ष, पारदर्शी र पूर्वाग्रहमुक्त बनाउन सचेत समेत गराउनुभएको छ।
“कानुन सत्तामा रहेका वा नरहेका सबैका लागि समान हुनुपर्छ,” चालिसेले भन्नुभयो। उहाँले राज्यका संस्थाहरूलाई राजनीतिक पूर्वाग्रह वा हल्लाका भरमा नभई तथ्य र प्रमाणका आधारमा मात्र अगाडि बढ्न आग्रह गर्नुभएको छ। साथै, सरकारका कारबाहीहरू ‘चयनात्मक’ हुन नहुने र सबैमाथि समान मापदण्ड अपनाउनुपर्नेमा जोड दिँदै उहाँले कार्यकर्ताहरूलाई अनुसन्धानमा अवरोध नपुर्याई सहयोग गर्न आह्वान गर्नुभएको छ।
