दुबई । पाँच देशको भ्रमणका क्रममा खाडी मुलुक यूएई पुगेका भारतीय प्रधानमन्त्री नरेन्द्र मोदी र यूएईका राष्ट्रपति शेख मोहम्मद बिन जायद अल नाह्यानबिच शुक्रबार अबुधाबीमा उच्चस्तरीय भेटवार्ता भएको छ। भेटका क्रममा प्रधानमन्त्री मोदीले हालैका दिनमा यूएईमाथि भएका मिसाइल तथा ड्रोन आक्रमणहरूको कडा निन्दा गर्दै पश्चिम एसियामा स्थायी शान्ति र स्थिरता कायम गर्न भारत जस्तोसुकै सहयोग गर्न तयार रहेको स्पष्ट पारेका छन्। विशेष सम्मानका साथ स्वागत गरिएका मोदीले रणनीतिक रूपमा महत्त्वपूर्ण मानिने ‘स्ट्रेट अफ होर्मुज’ बाट जहाजहरूको सुरक्षित र निर्वाध आवतजावत हुनुपर्नेमा जोड दिए।
यस ऐतिहासिक भ्रमणका क्रममा भारत र यूएईबिच उन्नत रक्षा प्रविधिको संयुक्त विकास, सह-उत्पादन र आतंकवादविरोधी सहकार्यलाई अझ बलियो बनाउने गरी ‘रणनीतिक रक्षा साझेदारीको ढाँचा’ मा हस्ताक्षर भएको छ। पश्चिम एसिया मामिलाका जानकारहरूका अनुसार इरान युद्धको मारमा परेको यूएईलाई बलियो कूटनीतिक समर्थन दिनु र द्विपक्षीय व्यापारिक सम्बन्धलाई प्रगाढ बनाउनु यो भ्रमणको मुख्य उद्देश्य हो। यूएई खाडी क्षेत्रमा भारतको सबैभन्दा ठूलो व्यापारिक साझेदार समेत हो।
ऊर्जा सुरक्षाका क्षेत्रमा दुई देशबिच रणनीतिक पेट्रोलियम भण्डारण क्षमतालाई ५.५ मिलियन ब्यारेलबाट बढाएर ३० मिलियन ब्यारेल पुर्याउने गरी महत्त्वपूर्ण समझदारी भएको छ। यसअन्तर्गत उडिसाको चण्डीखोल र यूएईको फुजैरामा नयाँ भण्डारण स्थलहरू विकास गरिनेछ भने पहिलो पटक एलपीजी र एलएनजी ग्यासका लागिसमेत रणनीतिक भण्डार बनाइने भएको छ। यसका साथै, यूएईका विभिन्न वित्तीय संस्थाहरूले भारतको पूर्वाधार, बैंकिङ र पुँजी बजारमा कुल ५ अर्ब अमेरिकी डलर लगानी गर्ने घोषणा गरेका छन्, जसलाई दुवै नेताले कूटनीतिक र आर्थिक इतिहासकै नयाँ माइलढुङ्गाका रूपमा स्वागत गरेका छन्।
