काठमाडौँ । सिरहाको औरही गाउँपालिकामा सञ्चालित ‘साना व्यावसायिक कृषि उत्पादन केन्द्र (पकेट) विकास कार्यक्रम’ मा अनियमितता गरी भ्रष्टाचार गरेको ठहर गर्दै अख्तियार दुरुपयोग अनुसन्धान आयोगले तत्कालीन प्रमुख प्रशासकीय अधिकृतसहित चार जनाविरुद्ध विशेष अदालतमा मुद्दा दायर गरेको छ।
आर्थिक वर्ष २०७८/०७९ मा माछापालनका लागि सञ्चालित सो कार्यक्रममा स्थलगत कामै नगरी तथा तोकिएको मापदण्ड पूरा नगरी झुट्टा बिल भरपाई बनाई रकम भुक्तानी लिएको अख्तियारको अनुसन्धानबाट खुलेको छ। गाउँपालिका र प्रगतिशील कृषक समूहबिच १५ लाख रुपैयाँमा सम्झौता भएकोमा माछाको भुरा, दाना र कृषि सामाग्री वितरण नै नगरी ८ लाख २ हजार ८ सय ७८ रुपैयाँ बढी भुक्तानी लिई हिनामिना गरिएको आयोगले जनाएको छ।
अख्तियारले औरही गाउँपालिकाका तत्कालीन प्रमुख प्रशासकीय अधिकृत अमरेन्द्र कुसियैत, तत्कालीन पशु शाखा प्रमुख रमेश नारायण शर्मा, तत्कालीन लेखापाल आशिष कुमार कामती र प्रगतिशील कृषक समूहका अध्यक्ष राम भजन यादवविरुद्ध जनही ८ लाख २ हजार ८ सय ७८ रुपैयाँ बिगो र भ्रष्टाचार निवारण ऐन बमोजिम कारबाहीको मागदाबी लिएर आरोपपत्र दायर गरेको हो।
