वाशिङ्टन । अमेरिकी कंग्रेसको माथिल्लो सदन (सिनेट) को नियन्त्रण कुन दलको हातमा पुग्नेछ भन्ने छिनोफानो गर्न आज देशभर मतदान भइरहेको छ । अमेरिकी राजनीतिक शक्ति सन्तुलन र राष्ट्रपति डोनाल्ड ट्रम्पको बाँकी कार्यकालको दिशा निर्धारण गर्ने यस मध्यावधि निर्वाचनलाई विश्वभर निकै चासोका साथ हेरिएको छ ।
सन् २०२६ को यस मध्यावधि निर्वाचनमा मतदानको औपचारिक दिनअगावै ५ करोड ६० लाखभन्दा बढी मतदाताले अग्रिम मतदान (अर्ली भोटिङ) गरिसकेका छन् । आज भने विभिन्न राज्यका हजारौँ मतदान केन्द्रहरूमा मतदाताहरू बिहानैदेखि लामबद्ध भएर आफ्नो मताधिकार प्रयोग गरिरहेका छन् ।
ताजा जनमत सर्वेक्षणहरूले विपक्षी डेमोक्र्याटहरू सिनेटमा बहुमतको नजिक पुगेको संकेत गरिरहेका बेला राष्ट्रपति ट्रम्पले कडा चेतावनी दिएका छन् । विपक्षीले कंग्रेसमा बहुमत हासिल गरेमा उनीहरूले पारित गर्ने हरेक विधेयकमा आफूले ‘भिटो’ प्रयोग गर्ने घोषणा ट्रम्पले गरेका छन् ।
आजको निर्वाचनमा सबैभन्दा बढी चासोको केन्द्र बनेको मिशिगन राज्यमा रिपब्लिकन उम्मेदवार माइक रोजर्स र डेमोक्र्याट उम्मेदवार अब्दुल एल-सईदबीच तीव्र प्रतिस्पर्धा भइरहेको छ । मतदानको अन्तिम समयमा डेमोक्र्याटिक सांसद हेली स्टिभेन्सले आफ्नै पार्टीका उम्मेदवारलाई छाडेर रिपब्लिकन उम्मेदवार रोजर्सलाई समर्थन जनाएपछि त्यहाँको राजनीतिक समीकरण थप पेचिलो बनेको छ ।
उता, मतदान सुरु हुनुभन्दा केही घण्टाअघि मात्र ट्रम्प प्रशासनले सर्वोच्च अदालतबाट कानुनी झट्का बेहोरेको छ । गैरनागरिकहरूले मत हालेको हुन सक्ने दाबी गर्दै क्यालिफोर्नियाका हजारौँ मतपत्रहरू गणनाबाट अलग राख्न न्याय मन्त्रालयले दिएको आपत्कालीन निवेदनलाई सर्वोच्च अदालतले रातारात खारेज गरिदिएको छ । अदालतको यस आदेशसँगै ती सबै मतपत्र नियमित गणनामा सामेल हुने भएका छन् ।
मिशिगन बाहेक साउथ क्यारोलिना, क्यान्सस, इन्डियाना र अलास्का जस्ता प्रमुख राज्यहरूमा पनि सिनेट सिटका लागि कडा टक्कर देखिएको छ । बढ्दो महँगी, अर्थतन्त्र र तीव्र दलगत ध्रुवीकरणका बीच आज मतपेटिकामा खस्ने जनमतले आगामी दुई वर्षसम्म अमेरिकाको नीति निर्माण र शक्ति सन्तुलन तय गर्नेछ ।
