काठमाडौँ– सरकार र थारु कल्याणकारिणी सभाबीच टीकापुर घटनामा दोषी ठहर भएका सांसद रेशमलाल चौधरीलगायतमाथिको मुद्दा फिर्ता र रिहाइका लागि संविधान र कानुनसम्मत पहल गर्ने सहमति भएको छ ।
नेपाल सरकारको तर्फबाट कानून न्याय संसदीय मामिला मन्त्री र थारु कल्याणकारिणी सभाबीच ६ बुँदे सहमति भएको हो । सरकार र थारू कल्याणकारिणी सभाको तर्फबाट गठित दुवै वार्ता टोलीबीचको वार्तापछि सहमति जुटेको हो ।
दुई पक्षबीच टीकापुर घटनामा दोषी ठहर भएका सांसद रेशम चौधरीसहित ५८ जनामाथि लागेका मुद्दा फिर्ता र रिहाइका लागि संविधान र कानुनसम्मत पहल गर्ने सहमति भएको थारु कल्याणकारिणी सभाका तर्फबाट वार्ता टोली संयोजक रुक्मिणी चौधरीले जानकारी दिइन् ।
त्यस्तै थरुहट/थारुवान आन्दोलनका क्रममा ज्यान गुमाई राहत नपाएका परिवारलाई राहत दिने, शहीद परिवारको उचित व्यवस्थापन गर्ने घाइतेको उपचार गर्ने र आन्दोलनका क्रममा विभिन्न स्थानमा भएको धनजनको क्षतिको छानबिन र मूल्यांकन गरी क्षतिपूर्ति उपलब्ध गराउने प्रक्रिया अघि बढाउने पनि सहमति भएको छ ।
