काठमाडौं । चितवनको मुग्लिन–नारायणगढ सडकखण्ड अन्तर्गत घुमाउने भन्ने स्थानमा बस पल्टिँदा ३८ जना यात्रु घाइते भएका छन् ।
दाङबाट काठमाडौंतर्फ आउँदै गरेको लुम्बिनी प्रदेश ०२-००१ ख ०४६६ नम्बरको नाइट बस आज बिहान करिब ३:१० बजे अनियन्त्रित भई सडकमै पल्टिएको हो ।
दुर्घटना लगत्तै प्रहरी टोलीले घटनास्थल पुगेर घाइतेहरूको उद्धार गरेको थियो । घाइते सबैलाई थप उपचारका लागि भरतपुर अस्पताल पठाइएको छ । घाइतेहरूको अवस्था र विस्तृत विवरण आउन बाँकी रहेको प्रहरीले जनाएको छ ।
बस सडकको बीचमै पल्टिएका कारण केही समय यातायात अवरुद्ध भएको थियो । यद्यपि, प्रहरी र स्थानीयको सहयोगमा दुर्घटनाग्रस्त बसलाई हटाई अहिले सडक पूर्ण रूपमा सुचारु भइसकेको छ ।
