काठमाडाैं । नेपाल आयल निगमले उपभोक्ताको ढाड सेक्ने गरी पेट्रोलियम पदार्थको मूल्यमा फेरि भारी वृद्धि गरेको छ। चैत महिनाभित्रै यो तेस्रो पटकको मूल्यवृद्धि हो, जसअनुसार पेट्रोल, डिजेल र मट्टितेलको भाउमा एकमुष्ट प्रतिलिटर १५ रुपैयाँ बढाइएको छ।
निगमको यो नयाँ निर्णय चैत २० गते मध्यरातदेखि देशभरका बिक्री केन्द्रहरूमा लागु हुनेछ।
पछिल्लो वृद्धिपछि काठमाडौँ, पोखरा र दिपायल जस्ता तेस्रो वर्गका क्षेत्रमा पेट्रोलको मूल्यले नयाँ उचाइ लिएको छ। १८७ रुपैयाँमा पाइने पेट्रोल अब प्रतिलिटर २०२ रुपैयाँ पुगेको छ भने १६७ रुपैयाँ पर्ने डिजेल र मट्टितेलको भाउ बढेर १८२ रुपैयाँ कायम भएको छ। तराईका प्रमुख सहरहरू विराटनगर, वीरगञ्ज र नेपालगञ्ज लगायतका पहिलो वर्गका क्षेत्रमा पनि पेट्रोलको मूल्य १९९ रुपैयाँ ५० पैसा र डिजेल/मट्टितेलको मूल्य १७९ रुपैयाँ ५० पैसा पुगेको निगमले जनाएको छ।
त्यस्तै, दोस्रो वर्गअन्तर्गतका सुर्खेत र दाङमा अब उपभोक्ताले पेट्रोलका लागि प्रतिलिटर २०१ रुपैयाँ र डिजेल तथा मट्टितेलका लागि १८१ रुपैयाँ बुझाउनुपर्नेछ। यसअघि यी क्षेत्रमा पेट्रोल १८६ र डिजेल १६६ रुपैयाँमा उपलब्ध थियो। निगमले भौगोलिक दुरीका आधारमा तीन फरक वर्गमा विभाजन गरी नयाँ दर रेट सार्वजनिक गरेको हो।
विशेष कुरा त के छ भने, निगमले यसअघि चैत १ र चैत १२ गते पनि इन्धनको भाउ बढाएको थियो। चैत १ मा पेट्रोलमा १५ र डिजेलमा १० रुपैयाँ बढाएको निगमले त्यसको १० दिनमै फेरि १५ रुपैयाँ थपेको थियो। यसरी २० दिनको अन्तरालमा मात्रै तीन पटकसम्म भएको लगातारको मूल्यवृद्धिले सर्वसाधारण र यातायात क्षेत्रमा ठूलो आर्थिक भार थपिने निश्चित देखिएको छ।
