विराटनगर । निरन्तरको वर्षा र पहाडी भूभागबाट लेदोसहितको बाढी आएपछि सप्तकोशी नदीमा पानीको सतह खतराको तह पार गरेको छ। स्थानीय प्रशासनले नदी तटीय क्षेत्रका बासिन्दाहरूलाई उच्च सतर्कता अपनाउन र सुरक्षित स्थानमा रहन अनुरोध गरेको छ।
कोशी ब्यारेजमा पानीको बहाव १ लाख ७६ हजार ८ सय क्युसेक पुगेको छ। पानीको सतह बढ्दो क्रममा रहेको र पश्चिम किनारतर्फ कटान सुरु भएकाले प्रशासनले सम्भावित जोखिमलाई मध्यनजर गर्दै कोशी ब्यारेजका ५२ मध्ये १८ वटा ढोका खोलेको छ।
सुनसरीका प्रमुख जिल्ला अधिकारी ईश्वरीप्रसाद अर्यालका अनुसार बराहक्षेत्र र कोशी गाउँपालिकाका तटीय बस्तीमा विशेष सतर्कता अपनाइएको छ। नदीमा माछा मार्ने, दाउरा टिप्ने, फोटो तथा भिडियो खिच्ने जस्ता जोखिमपूर्ण गतिविधिमा पूर्ण रूपमा रोक लगाइएको छ।
