काठमाडौँ । आईसीसी पुरुष क्रिकेट विश्वकप लिग–२ अन्तर्गतको अत्यन्तै प्रतिस्पर्धात्मक खेलमा नेपालले घरेलु टोली ओमानलाई १० रनले पराजित गरेको छ । सोमबार ओमानको अल अमेरात क्रिकेट मैदानमा सम्पन्न खेलमा नेपालले प्रस्तुत गरेको २८१ रनको लक्ष्य पछ्याएको ओमानले ५० ओभरमा ७ विकेट गुमाएर २७० रन मात्र जोड्न सक्यो ।
ओमानका लागि जतिन्दर सिंहले ८९ रन र हम्माद मिर्जाले ८७ रनको उत्कृष्ट अर्धशतकीय इनिङ्स खेल्दै टोलीलाई जितको नजिक पुर्याएका थिए । तर, खेलको अन्तिम ओभरहरूमा नेपाली बलरहरूले कसिलो बलिङ गर्दै खेल आफ्नो पक्षमा पारे । बलिङतर्फ नेपालका ललित राजवंशी र दीपेन्द्रसिंह ऐरीले समान २–२ विकेट लिए ।
यसअघि पहिले ब्याटिङको निम्तो पाएको नेपालले ५० ओभरमा आफ्ना सबै विकेट गुमाउँदै २८० रनको बलियो योगफल तयार पारेको थियो । नेपालका लागि कप्तान रोहित पौडेलले सर्वाधिक ८० रनको कप्तानी इनिङ्स खेले भने दीपेन्द्रसिंह ऐरीले ६९ रन र देव खनालले ५७ रनको महत्त्वपूर्ण योगदान दिएका थिए । ओमानका शाह फैसलले ५ विकेट लिएका थिए ।
यस महत्त्वपूर्ण जितसँगै नेपाल लिग–२ को अङ्क तालिकाको छैटौँ स्थानमा उक्लिएको छ । जारी प्रतियोगितामा नेपालले ३६ खेलबाट १४ जितसहित ३० अङ्क जोडेको छ । यस जितले नेपालको एकदिवसीय (ओडीआई) अन्तर्राष्ट्रिय मान्यता कायमै राख्ने सम्भावनालाई निकै बलियो बनाएको छ ।
