काठमाडौँ । पूर्वप्रधानमन्त्री एवं नेकपा एमालेका अध्यक्ष केपी शर्मा ओली र नेपाली कांग्रेसका नेता एवं पूर्वगृहमन्त्री रमेश लेखकलाई थुनामुक्त गर्न माग गर्दै दायर गरिएको बन्दीप्रत्यक्षीकरण रिट निवेदनमा आइतबारको सुनुवाइ नसकिएपछि ‘हेर्दाहेर्दै’ मा राखिएको छ। न्यायाधीशद्वय विनोद शर्मा र सुनीलकुमार पोखरेलको इजलासमा सुरु भएको बहस समय अभावका कारण पुरा हुन नसकेपछि सोमबारका लागि सारिएको सर्वोच्च अदालतका प्रवक्ता अर्जुनप्रसाद कोइरालाले जानकारी दिनुभयो।
गत चैत १५ गते अध्यक्ष ओलीकी पत्नी राधिका शाक्य र नेता लेखककी पत्नी यशोदा लेखकले उनीहरूलाई गैरकानुनी रूपमा थुनामा राखिएको दाबी गर्दै सर्वोच्चमा रिट दायर गर्नुभएको थियो। गत भदौ २३ र २४ गते भएको ‘जेनजी’ (Gen-Z) आन्दोलनका क्रममा भएको दमन र मानवीय क्षतिको छानबिन गर्न गठित गौरीबहादुर कार्की नेतृत्वको आयोगले दोषी ठहर गर्दै कारबाहीका लागि सिफारिस गरेपछि सरकारले उनीहरूलाई पक्राउ गरेको थियो।
यसअघि न्यायाधीश मेघराज पोखरेल र कुमार रेग्मीको छुट्टाछुट्टै इजलासले सरकारका नाममा ‘कारण देखाऊ’ आदेश जारी गरेको थियो। विपक्षीका तर्फबाट लिखित जवाफ आइसकेकाले अब सोमबार हुने सुनुवाइले उनीहरूलाई हिरासतमा राख्नु कानुनी छ वा छैन भन्नेबारे महत्त्वपूर्ण आदेश दिने अपेक्षा गरिएको छ। एमाले र कांग्रेसले भने यो पक्राउलाई राजनीतिक प्रतिशोधको संज्ञा दिँदै आएका छन्।
हाल अध्यक्ष ओली स्वास्थ्य समस्याका कारण त्रिभुवन विश्वविद्यालय शिक्षण अस्पताल (TUTH) मा उपचाररत हुनुहुन्छ भने नेता लेखक प्रहरी हिरासतमा हुनुहुन्छ। बालेन्द्र शाह नेतृत्वको सरकारले आयोगको प्रतिवेदन कडाइका साथ कार्यान्वयन गर्ने रणनीति लिएपछि पुराना राजनीतिक दलका शीर्ष नेताहरूमाथि कानुनी शिकञ्जा कसिएको हो। भोलिको सर्वोच्चको फैसलाले मुलुकको राजनीतिमा थप प्रभाव पार्ने देखिन्छ।
