काठमाडौँ । नेपाली कांग्रेसका नेता एवं सांसद अर्जुननरसिंह केसीले लोकतान्त्रिक प्रणालीमा सत्तापक्षको सङ्ख्या जतिसुकै धेरै भए पनि सदन भने विपक्षको हुनुपर्ने धारणा राख्नुभएको छ। सोमबार बसेको प्रतिनिधिसभाको बैठकमा बोल्दै सांसद केसीले नवनिर्वाचित सभामुख डोलप्रसाद (डीपी) अर्याललाई सदनको सन्तुलन कायम राख्न र विपक्षको आवाजलाई प्राथमिकता दिन आग्रह गर्नुभयो।
विगतका संसदीय अभ्यास र लोकतान्त्रिक मूल्यमान्यताका उदाहरण दिँदै केसीले सदन सत्तापक्षको खल्तीको संस्था बन्न नहुनेमा जोड दिनुभयो। “सदनमा सत्तापक्ष जतिसुकै ठूलो भए पनि, सदन विपक्षको हो। यो विश्वव्यापी संसदीय मान्यता हो,” उहाँले भन्नुभयो। विपक्षलाई ‘आगोको झिल्को’ सँग तुलना गर्दै उहाँले थप्नुभयो, “आगोको झिल्को जतिसुकै सानो भए पनि त्यो आगोकै झिल्को हुन्छ, यसलाई नजरअन्दाज गरियो भने परिणाम गम्भीर हुन सक्छ।”
सांसद केसीले ‘जेनजी’ (Gen-Z) आन्दोलनपछिको नयाँ राजनीतिक परिस्थितिमा संसद् कसैको पनि बन्दी हुन नहुने बताउनुभयो। बालेन्द्र शाह नेतृत्वको सरकार र नयाँ शक्तिहरूको उदय भइरहेको सन्दर्भमा उहाँले सदनलाई स्वतन्त्र, निष्पक्ष र जनउत्तरदायी बनाएर लैजाने वातावरण निर्माण गर्न सभामुखको ध्यानाकर्षण गराउनुभयो।
सदनमा सत्तापक्षको भारी बहुमत र पुराना दलहरू प्रतिपक्षमा रहेको वर्तमान अवस्थामा केसीको यो भनाइलाई निकै अर्थपूर्ण रूपमा हेरिएको छ। उहाँले सरकारलाई अङ्कुश लगाउने र जनताका प्रश्नहरूलाई जीवित राख्ने काम विपक्षको भएकाले त्यसका लागि पर्याप्त समय र स्थान उपलब्ध गराउनु सभामुखको दायित्व भएको उल्लेख गर्नुभयो।
