काठमाडौँ । प्रतिनिधि सभाको बैठक कक्षभित्र अबदेखि सांसद तथा अन्य कसैले पनि फोटो खिच्न, अडियो रेकर्ड गर्न वा भिडियो खिच्न नपाउने भएका छन्। प्रतिनिधि सभा कार्यसञ्चालन नियमावलीको नयाँ मस्यौदामा यस्तो कडा व्यवस्था समावेश गरिएको हो। नियमावलीको नियम २० मा बैठकमा पालन गर्नुपर्ने नियमहरू शीर्षक अन्तर्गत यो नयाँ नियम थपिएको छ।
उक्त नियमको उपनियम (ट) मा बैठक कक्षमा फोन अनिवार्य रूपमा साइलेन्ट मोडमा राख्नुपर्ने व्यवस्था गरिएको छ। यसका साथै बैठक चलिरहेका बेला फोनमा कुरा गर्न, फोटो खिच्न तथा कुनै पनि प्रकारको अडियो र भिडियो रेकर्ड गर्न पूर्ण रूपमा निषेध गरिएको छ। यसअघिको कार्यसञ्चालन नियमावलीमा यस्तो स्पष्ट प्रतिबन्धको व्यवस्था थिएन, जसका कारण कतिपय सांसदहरूले बैठक भित्रैबाट सामाजिक सञ्जालका लागि भिडियो बनाउने वा फोटो खिच्ने गरेका थिए।
संसद्को गरिमा कायम राख्न र बैठकको अनुशासनलाई थप व्यवस्थित बनाउन यो कदम चालिएको बुझिएको छ। नयाँ नियमावली पारित भएपछि बैठक कक्षभित्रका गतिविधिहरूलाई व्यक्तिगत रूपमा रेकर्ड गरी बाहिर सार्वजनिक गर्ने कार्यमा रोक लाग्नेछ। यद्यपि, संसद्को आधिकारिक प्रत्यक्ष प्रसारण र मिडिया कभरेजका सम्बन्धमा भने साविककै व्यवस्था रहनेछ।
