काठमाडौं । काठमाडौं महानगरपालिकाकी कार्यवाहक प्रमुख सुनिता डंगोल विश्वकै प्रतिष्ठित चलचित्र महोत्सव ‘कान्स फिल्म फेस्टिभल’ मा सहभागी हुने भएकी छन्।
फ्रान्समा आयोजना भइरहेको यस भव्य महोत्सवमा भाग लिन उनी आज साँझ नै त्यसतर्फ प्रस्थान गर्ने कार्यक्रम रहेको छ। महानगरका प्रवक्ता नवीन मानन्धरका अनुसार कार्यवाहक प्रमुख डंगोल यस वैदेशिक भ्रमणमा एक्लै निस्कन लागेकी हुन्।
चार दिने फ्रान्स बसाइका क्रममा डंगोलले कान्स महोत्सवको भव्यता, व्यवस्थापन र सिनेमा जगतको बदलिँदो स्वरूपलाई नजिकबाट अनुभव गर्नेछिन्। यसका साथै उनले महोत्सवका प्रमुख अधिकारीहरूलाई भेटेर नेपालको सङ्घीय राजधानी काठमाडौं भ्रमणका लागि औपचारिक निमन्त्रणा समेत दिने कार्यक्रम तय भएको छ।
महानगरपालिकाले यो भ्रमणलाई आफ्नो एउटा विशेष महत्वाकाङ्क्षी योजनाको पूर्वतयारीको रूपमा लिएको छ। निकट भविष्यमै महानगरले आफ्ना स्थानीय टोल–टोलमा ‘काठमाडौं फिल्म फेस्टिभल’ आयोजना गर्ने गृहकार्य गरिरहेको छ। विश्वकै प्रतिष्ठित मञ्चमा चलचित्र महोत्सवहरू कसरी व्यवस्थापन गरिन्छ भन्ने कुरा सिकेर त्यसलाई काठमाडौंका स्थानीय कार्यक्रमहरूमा लागू गर्ने महानगरको मुख्य उद्देश्य छ।
अन्तर्राष्ट्रिय स्तरमा काठमाडौंको पहिचान कला, संस्कृति र सिनेमासँग गहिरो गरी जोडिएको छ। यसअघि महानगरका प्रमुख बालेन्द्र शाह (बालेन) ले पनि यो अन्तर्राष्ट्रिय महोत्सवमा सहभागिता जनाइसकेका छन्। यसका साथै संयुक्त राष्ट्रसङ्घीय निकाय युनेस्कोले समेत काठमाडौं शहरलाई ‘क्रिएटिभ सिटी अफ फिल्म’ (चलचित्रको शहर) को रूपमा मान्यता दिइसकेको छ।
विश्वभरका उत्कृष्ट चलचित्र र दिग्गज सिनेमाकर्मीहरूको जमघट हुने यो प्रख्यात कान्स फिल्म फेस्टिभल आगामी मे २१ सम्म फ्रान्समा चल्नेछ।
