काठमाडौँ । नेपाली कांग्रेसभित्रको संस्थापन इतर समूहको तीन दिने ‘राष्ट्रिय भेला’ आज (शुक्रबार) देखि काठमाडौँमा सुरु हुँदैछ। सुकेधारास्थित मिराकल पार्टी प्यालेसमा आयोजना हुने उक्त राष्ट्रिय भेलाको उद्घाटन सत्रमा प्रमुख अतिथिका रूपमा पूर्वसभापति शेरबहादुर देउवा सहभागी हुने तय भएको छ।
राष्ट्रिय भेला आयोजक समितिका अनुसार आज दिउँसो १:०० बजे भेलाको भव्य रूपमा उद्घाटन गरिनेछ। पहिलो दिन उद्घाटन समारोह सम्पन्न भएपछि बाँकी दुई दिन पार्टीको नीति, विधान, समसामयिक राजनीतिक अवस्था र साङ्गठनिक सुदृढीकरणका विषयमा बन्द सत्रमार्फत गहन छलफल हुने कार्यतालिका तय गरिएको छ।
भेलालाई व्यवस्थित बनाउन आवश्यक सम्पूर्ण तयारी पूरा भइसकेको छ। साउन ३१ गतेसम्म चल्ने यस राष्ट्रिय भेलामा देशभरबाट महाधिवेशन प्रतिनिधि, प्रदेश, जिल्ला तथा क्षेत्रीय तहका गरी पाँच हजारभन्दा बढी नेता तथा कार्यकर्ताहरूको प्रत्यक्ष सहभागिता रहने अनुमान गरिएको छ।
