काठमाडौँ । नेपालमा हाल पश्चिमी वायुको सामान्य प्रभाव रहेका कारण देशभरको मौसममा आंशिकदेखि साधारणतया बदली देखिएको छ। मौसम पूर्वानुमान महाशाखाका अनुसार हाल कोशी, गण्डकी र कर्णाली प्रदेशका उच्च पहाडी तथा हिमाली क्षेत्रमा बादल लागेको छ भने अन्य भूभागको मौसम सामान्यतया सफा रहेको छ।
आज दिउँसो लुम्बिनी, कर्णाली र सुदूरपश्चिम प्रदेशमा साधारणतया बादल लाग्ने र तराईका केही स्थानहरूमा मध्यान्नसम्म हुस्सु तथा कुहिरो लाग्ने सम्भावना छ। विशेषगरी कोशी र गण्डकी प्रदेशका उच्च पहाडी तथा हिमाली भूभागका एक-दुई स्थानमा हल्का वर्षासहित हिमपातको सम्भावना रहेको महाशाखाले जनाएको छ।
रातिको समयमा पनि तराईका केही भागमा तुवाँलो लाग्ने र पहाडी क्षेत्रमा बादल लाग्ने क्रम जारी रहनेछ। चिसोबाट बच्न र आवश्यक सतर्कता अपनाउन महाशाखाले सबैमा अनुरोध गरेको छ।
