काठमाडौँ । नेपालमा हाल पश्चिमी वायुको सामान्य प्रभाव रहेका कारण देशभरिको मौसममा आंशिक बदली देखिएको छ। मौसम पूर्वानुमान महाशाखाका अनुसार आज कोशी, बागमती र गण्डकी प्रदेशका उच्च पहाडी तथा हिमाली भूभागका एक-दुई स्थानमा हल्का वर्षासहित हिमपातको सम्भावना रहेको छ।
आज दिउँसो तराईका केही स्थानहरूमा मध्यान्नसम्म हुस्सु र कुहिरो लाग्ने भए तापनि बाँकी समयमा मौसम मुख्यतया सफा रहनेछ। पहाडी क्षेत्रमा भने कोशी, बागमती, गण्डकी र कर्णाली प्रदेशमा साधारणतया बादल लाग्ने देखिएको छ।
रातिको समयमा पनि कोशी, गण्डकी र कर्णाली प्रदेशका उच्च हिमाली भेगमा हल्का वर्षा र हिमपातको सम्भावना कायमै रहने महाशाखाले जनाएको छ। चिसोको प्रभाव रहिरहने हुनाले आवश्यक सतर्कता अपनाउन मौसमविद्हरूले आग्रह गरेका छन्।
