काठमाडौँ । नेपालमा हाल पश्चिमी वायुको आंशिक प्रभाव रहेका कारण पहाडी तथा हिमाली भूभागको मौसममा बदलाब आएको छ।
मौसम पूर्वानुमान महाशाखाका अनुसार आज कोशी, बागमती र गण्डकी प्रदेशका उच्च पहाडी तथा हिमाली क्षेत्रका साथै पहाडी भूभागका एक-दुई स्थानमा हल्का वर्षासहित हिमपातको सम्भावना रहेको छ।
आज दिउँसो तराईका केही स्थानहरूमा मध्यान्नसम्म हुस्सु र कुहिरो लाग्ने भए तापनि बाँकी समयमा मौसम सामान्यतया सफा रहनेछ। कोशी, बागमती, गण्डकी र कर्णाली प्रदेशका हिमाली भेगमा साधारणतया बादल लाग्ने देखिएको छ।
रातिको समयमा पनि कोशी र गण्डकी प्रदेशका उच्च पहाडी तथा हिमाली भूभागमा हल्का वर्षा र हिमपातको सम्भावना कायमै रहने महाशाखाले जनाएको छ।
चिसोको प्रभाव र हिमपातको सम्भावनालाई मध्यनजर गर्दै आवश्यक सतर्कता अपनाउन मौसमविद्हरूले आग्रह गरेका छन्।
