काठमाडौँ । जल तथा मौसम विज्ञान विभाग, मौसम पूर्वानुमान महाशाखाका अनुसार भोलि फागुन ५ गते मङ्गलबार देशका विभिन्न भू-भागको मौसममा आंशिक बदली रहने देखिएको छ।
विशेषगरी कोशी, गण्डकी र कर्णाली प्रदेशका उच्च पहाडी तथा हिमाली भू-भागका एक-दुई स्थानमा हल्का वर्षासँगै हिमपातको सम्भावना रहेको छ।
मङ्गलबार दिउँसो तराईका केही स्थानहरूमा मध्यान्नसम्म हुस्सु र कुहिरो लाग्ने हुनाले यातायात तथा जनजीवनमा केही प्रभाव पर्न सक्ने देखिएको छ। देशका अन्य उच्च पहाडी तथा हिमाली भू-भागमा आंशिक बादल लागे पनि बाँकी क्षेत्रको मौसम भने मुख्यतया सफा रहनेछ।
रातिको समयमा कर्णाली, सुदूरपश्चिम र गण्डकी प्रदेशका पहाडी तथा हिमाली भेगमा आंशिक बादल लाग्ने र गण्डकी प्रदेशका केही उच्च स्थानमा हल्का हिमपातको सम्भावना कायमै रहने महाशाखाले जनाएको छ। तराईका केही क्षेत्रमा भने राति तुवाँलो लाग्न सक्नेछ।
