काठमाडौँ । जल तथा मौसम विज्ञान विभाग, मौसम पूर्वानुमान महाशाखाका अनुसार हाल नेपालमा पश्चिमी वायु, उपल्लो वायुमण्डलमा रहेको उच्च चापीय प्रणाली र पूर्वी भू–भाग नजिक तल्लो वायुमण्डलमा रहेको न्यून चापीय क्षेत्रको आंशिक प्रभाव रहेको छ। केही दिनदेखि देशका विभिन्न भागमा देखिएको तुवाँलो अब क्रमिक रूपमा हट्दै जाने मौसमविद्ले जनाएका छन्।
महाशाखाका अनुसार आज (बुधबार, ११ मार्च २०२६) दिउँसो देशका पहाडी भू–भागमा आंशिकदेखि साधारणतया बदली रहनेछ। कोशी, बागमती, गण्डकी र लुम्बिनी प्रदेशका पहाडी र हिमाली भू–भागका थोरै स्थानहरूमा तथा कर्णाली र सुदूरपश्चिम प्रदेशका पहाडी र हिमाली भू–भागका साथै अन्य केही स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ।
रातिको समयमा पनि कोशी, मधेस, बागमती, गण्डकी र लुम्बिनी प्रदेश लगायत देशको पहाडी र हिमाली भू–भागमा आंशिकदेखि साधारणतया बदली रहनेछ। महाशाखाले पहाडी र हिमाली क्षेत्रमा यात्रा गर्दा चट्याङ र हिमपातको जोखिमलाई ध्यानमा राख्दै आवश्यक सतर्कता अपनाउन अनुरोध गरेको छ। पछिल्ला दिनमा उच्च चापीय प्रणालीका कारण देखिएको तुवाँलो भोलिदेखि थप सुधार हुने सम्भावना रहेको छ।
