काठमाडौँ । हाल नेपालमा पश्चिमी न्यून चापीय प्रणालीका साथै स्थानीय वायुको संयुक्त प्रभाव रहेको मौसम पूर्वानुमान महाशाखाले जनाएको छ। यस मौसमी प्रणालीका कारण हाल कोशी, मधेस र बागमती प्रदेशलगायत देशका पहाडी तथा हिमाली भूभागमा साधारणतया बदली रहेको छ भने बाँकी तराईका क्षेत्रहरूमा आंशिक बदली देखिएको छ।
महाशाखाका अनुसार आज दिउँसो देशको पहाडी र हिमाली भूभागमा मौसम साधारणतया बदली नै रहनेछ भने तराईका भूभागमा आंशिक बदली हुनेछ। यस क्रममा पहाडी र हिमाली भेगका केही स्थानहरूका साथै कोशी र लुम्बिनी प्रदेशका तराई भूभागका एक–दुई स्थानमा मेघगर्जन र चट्याङ्गसहित हल्का वर्षाको सम्भावना रहेको छ। साथै उच्च पहाडी तथा हिमाली क्षेत्रका थोरै स्थानहरूमा हल्का हिमपात हुन सक्ने पूर्वानुमान गरिएको छ।
आज राति देशभरको मौसममा आंशिकदेखि साधारण बदली रहनेछ। विशेष गरी हिमाली भूभागमा साधारणतया बदली रहने र बाँकी पहाडी भेगमा आंशिक बदली हुने महाशाखाले जनाएको छ। तराईका बाँकी क्षेत्रहरूमा भने मौसम मुख्यतया सफा रहनेछ। कोशी र गण्डकी प्रदेशको पहाडी तथा हिमाली भूभागका एक–दुई स्थानमा चट्याङ्गसहित हल्का वर्षा र हिमपातको सम्भावना रहेको बुलेटिनमा उल्लेख छ।
पछिल्लो समय मौसममा आइरहेको यो फेरबदलका कारण तापक्रममा सामान्य गिरावट आउन सक्ने र चट्याङ्गको जोखिम रहने हुनाले महाशाखाले आवश्यक सतर्कता अपनाउन सर्वसाधारणलाई आग्रह गरेको छ। विशेष गरी कृषि कार्य र पदयात्रामा निस्कनेहरूलाई मौसमको अवस्था बुझेर मात्र अघि बढ्न सुझाव दिइएको छ।
