काठमाडौँ । हाल नेपालमा पश्चिमी वायुका साथै स्थानीय वायुको संयुक्त प्रभाव रहेकाले देशभरको मौसममा फेरबदल आएको जल तथा मौसम विज्ञान विभाग, मौसम पूर्वानुमान महाशाखाले जनाएको छ। यस मौसमी प्रणालीको सक्रियताका कारण अहिले देशका पहाडी तथा हिमाली भू-भागमा साधारणतया बदली रहेको छ भने अन्य क्षेत्रमा आंशिक बदलीको अवस्था छ।
महाशाखाका अनुसार हाल गण्डकी, कर्णाली र सुदूरपश्चिम प्रदेशका पहाडी तथा हिमाली क्षेत्रका केही स्थानमा मेघगर्जन र चट्याङ्गसहित हल्का वर्षा भइरहेको छ। आज दिउँसो र राति पनि देशका विभिन्न भागमा वर्षा र हिमपातको सम्भावना देखिएको छ। विशेष गरी कोशी, बागमती र गण्डकी प्रदेशका पहाडी तथा हिमाली भू-भागका थोरै स्थानमा मध्यम वर्षा हुन सक्ने पूर्वानुमान गरिएको छ।
यस्तै, मधेस प्रदेशसहित कोशीको तराई क्षेत्र तथा लुम्बिनी, कर्णाली र सुदूरपश्चिमका पहाडी भू-भागमा पनि मेघगर्जन र चट्याङ्गसहित वर्षा र हिमपात हुन सक्ने महाशाखाले जनाएको छ। तराईका क्षेत्रमा आंशिक बदली रहने र पहाडी भेगमा बादल लाग्ने क्रम जारी रहनेछ।
प्रि-मनसुनको समय भएकाले वायुमण्डल अशान्त रहने र छोटो समयमा नै मौसम परिवर्तन भई चट्याङ्ग तथा हावाहुरी चल्ने जोखिम हुन्छ। महाशाखाले चट्याङ्ग र वर्षाबाट हुन सक्ने सम्भावित जोखिमबाट बच्न आवश्यक सतर्कता अपनाउन सर्वसाधारणमा अनुरोध गरेको छ। हिमाली भेगमा हुने हिमपातले पदयात्रा र जनजीवनमा प्रभाव पार्न सक्ने भएकाले विशेष ध्यान दिन भनिएको छ।
