काठमाडौँ । आज २०८३ वैशाख १४ गते सोमबार देशभरको मौसममा आंशिकदेखि सामान्य बदली रहने जल तथा मौसम पूर्वानुमान महाशाखाले जनाएको छ। हाल देशमा पश्चिमी र स्थानीय वायुका साथै पूर्वी भू-भाग नजिक रहेको न्यून चापीय क्षेत्रको आंशिक प्रभाव रहेको छ।
आज दिउँसो कोशी, बागमती र गण्डकी प्रदेशमा साधारणतया बदली रहनेछ भने मधेस, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू-भागमा आंशिक बदली रहने सम्भावना छ। महाशाखाका अनुसार कोशी, बागमती र गण्डकीका पहाडी तथा हिमाली क्षेत्रका थोरै स्थानहरूमा मेघगर्जन र चट्याङ्गसहित मध्यम वर्षा तथा हिमपातको सम्भावना रहेको छ।
यसैगरी लुम्बिनी, कर्णाली र सुदूरपश्चिमका हिमाली क्षेत्रका एक-दुई स्थानमा पनि वर्षा र हिमपात हुन सक्ने देखिएको छ। पहाडी क्षेत्रमा वर्षाको सम्भावना भए तापनि लुम्बिनी र सुदूरपश्चिम प्रदेशका तराई भू-भागमा भने आज पनि अत्यधिक गर्मी र ‘तातो दिन’ हुने सम्भावना रहेको छ। गएराति पनि देशका पहाडी र हिमाली भेगमा बदली रही केही स्थानमा वर्षा भएको महाशाखाले जानकारी दिएको छ।
